پاکستان تحریک انصاف (پی ٹی آئی) کے رہنما فرخ حبیب نے کہا ہے کہ حمزہ شہباز شریف جعلی وزیراعلیٰ ہیں۔

فرخ حبیب نے بول نیوز سے گفتگو کرتے ہوئے کہا کہ ن لیگ والے ہمیشہ گود میں بیٹھ کر فیڈر پیتے رہے، ان کے رونے کی آوازیں مریخ تک جارہی ہیں۔

انہوں نے کہا کہ ن لیگ والے انوکھے لاڈلے ہیں، پنجاب ہاتھ سے نکلا تو انکی دھونس، دھمکیاں ختم ہوجائیں گی، ان کی ساری تاریخ عدلیہ پر دباؤ اور حملوں سے بھری پڑی ہے۔

پی ٹی آئی رہنما نے کہا کہ کوئٹہ بینچ بریف کیس، مرضی کے فیصلوں کا حکم دینا انکا کام ہے، شہباز شریف اور فسادی رانی 2سال سے ضمانت پر ہیں، انہیں عدالتوں سے ریلیف ملے۔

فرخ حبیب نے کہا کہ مرضی کے فیصلے نہ آئیں توعدلیہ بری ہوجاتی ہے، یہ چاہتے ہیں ہمیشہ لاڈلے رہیں۔

انہوں نے مزید کہا کہ حمزہ شہباز شریف جعلی وزیراعلیٰ ہیں، ڈپٹی اسپیکر چابی والا لاٹو ہے۔

دوسری جانب فرخ حبیب نے ایک بار پھر شفاف الیکشن کروانے کا مطالبہ کردیا ہے۔

انہوں نے کہا کہ نالائق اعظم شہباز شریف نے 100 دن میں ایسی تباہی کردی ہے کہ ملک کے اثاثے بیچنے پر آگئے ہیں، سازش کے تحت چوسنی لیکر اقتدار میں تو بٹھا دیا گیا، لیکن اب ملک کیسے چلانا ہے وہ اس نالائق اعظم کو کون سکھائے؟ فوری صاف شفاف الیکشن کرواؤ اور ملک کو ان نااہل نکموں، چوروں سے نجات دلواؤ۔