پاکستان تحریک انصاف کی رہنما ڈاکٹر یاسمین راشد نے واثق قیوم کو ڈپٹی اسپیکر پنجاب اسمبلی منتخب ہونے پر مبارکباد دی ہے۔

تفصیلات کے مطابق پاکستان تحریک انصاف کی رہنما ڈاکٹر یاسمین راشد نے اپنے بیان میں کہا کہ واثق قیوم کو بلامقابلہ ڈپٹی اسپیکر پنجاب اسمبلی منتخب ہونے پر مبارکباد پیش کرتے ہیں۔

انہوں نے کہا کہ پنجاب اسمبلی سے مسلسل کامیابیوں کا سہرا ثابت قدم رہنے والے پی ٹی آئی  کارکنان  کو جاتا ہے۔

دوسری جانب پی ٹی آئی کے سیکرٹری اطلاعات عندلیب عباس نے کہا کہ پنجاب اسمبلی میں عمران خان کے بیانیے کی جیت ہوئی اور امپورٹڈ حکمران اتحاد کو بدترین شکست ہوئی۔

انہوں نے کہا کہ امپورٹڈ حکمران اتحاد شکست کے خوف سے  ڈپٹی اسپیکر کے انتخابات سے بھاگ گئے، رونا دھونا، شور مچانا ن لیگ اور پیپلز پارٹی والوں کا مقدر بن چکا ہے۔

پی ٹی آئی کی پنجاب میں ایک اور کامیابی؛ واثق قیوم ڈپٹی اسپیکر پنجاب اسمبلی منتخب

  پاکستان تحریک انصاف (پی ٹی آئی)کے امیدوار واثق قیوم بلا مقابلہ ڈپٹی اسپیکر پنجاب اسمبلی منتخب ہوگئے ہیں۔

تفصیلات کے مطابق ڈپٹی اسپیکر دوست محمد مزاری کے خلاف عدم اعتماد کی تحریک کامیاب ہونے کے بعد ڈپٹی اسپیکر کی نشست خالی تھی، پی ٹی آئی نے ڈپٹی اسپیکر کیلئے واثق قیوم عباسی کو امیدوار نامزد کیا تھا اور انہوں نے اپنے کاغذات مامزدگی جمع کرائے تھے تاہم اب وہ بلا مقابلہ ڈپٹی اسپیکر پنجاب اسمبلی منتخب ہوگئے۔

واضح رہے کہ پنجاب اسمبلی میں اپوزیشن جماعتوں نے علی حیدر گیلانی کو امیدوار نامزد کیا تھا لیکن ڈپٹی اسپیکر کے امیدوار علی حیدر گیلانی کی جانب سے کاغذات جمع نہ کرائے جاسکے جس کی وجہ سے علی حیدر گیلانی انتخاب کی دوڑ سے ہی باہر ہوگئے۔

ڈپٹی اسپیکر پنجاب اسمبلی منتخب ہونے کے بعد واثق قیوم نے میڈیا سے گفتگو کرتے ہوئے کہا کہ آج وزیر اعلیٰ ، اسپیکر اور ڈپٹی اسپیکر تحریک انصاف کے پاس ہے، امپورٹڈ حکومت نے بڑے دعوے کیے تھے عوام نے ان کا علاج کردیا ہے، اب ہمارا رخ وفاقی حکومت کی جانب ہے، ہماری کامیابیوں کا تسلسل جاری رہے گا۔