لاہورہائی کورٹ نے ضمنی انتخابات کیلئے جاری ووٹر لسٹوں کیخلاف پی ٹی آئی کی درخواست پر عائد اعتراض ختم کردیا۔ 

تفصیلات کے مطابق عدالت نے ڈاکٹر یاسمین راشد کی درخواست کو سماعت کے لئے  آج ہی مقرر کرنے کی ہدایت کر دی۔

جسٹس ساجد محمود سیٹھی نے ڈاکٹر یاسمین کی درخواست پر اعتراض کی سماعت کی جبکہ لاہورہائیکورٹ رجسٹرار آفس نے ڈاکٹر یاسمین راشد  کی درخواست پر گزشتہ روز مصدقہ نقول نہ لگانے کا اعتراض عائد کیا تھا۔

پی ٹی آئی رہنما ڈاکٹر یاسمین راشد نے ضمنی انتخابات کیلئے جاری ووٹر لسٹیں چیلنج کررکھا ہے جس میں الیکشن کمیشن، صوبائی الیکشن کمیشن اور ڈسٹرکٹ ریٹرننگ آفیسر کو فریق بنایا گیا ہے۔

ڈاکٹر یاسمین راشد کی دائر کردہ درخواست میں مؤقف اپنایا گیا ہے کہ لاہورمیں انتخابی حلقوں میں ووٹر لسٹوں میں رد و بدل کر کے فراڈ کیا جا رہا ہے۔ الیکشن کمیشن کو ووٹرز کے ووٹ دوسرے حلقوں میں منتقل کرنے پر درخواستیں بھی دیں مگر شنوائی نہیں ہوئی۔

درکواست میں کہا گیا کہ ضمنی انتخاب کے حلقوں میں دوسرے حلقوں کے ووٹر کو لسٹوں میں شامل کیا گیا ہے۔ عدالت سے استدعا ہے کہ ووٹرلسٹوں کو الیکشنزایکٹ اور رولز سے متصادم قراردے کر کالعدم کیا جائے۔

درخواست میں یہ بھی استدعا کی گئی کہ 25 مئی کے جاری کردہ نوٹیفکیشن سے پہلے کی ووٹر لسٹوں پر ضمنی انتخاب کروانے کاحکم دیا جائے۔ ضمنی انتخابات میں حکومتی مشینری کے بے دریغ استعمال کو بھی روکا جائے۔