احتساب عدالت لاہورنے وزیراعظم شہبازشریف اوروزیراعلٰی حمزہ شہباز کی حاضری معافی کی درخواست منظورکر لی۔ 

وکیل امجد پرویز نے دونوں کی جانب سے حاضری معافی کی درخواست دائرکرتے ہوئے مؤقف اختیار کیا تھا کہ شہباز شریف اور حمزہ شہباز مصروفیت کے باعث آج عدالت پیش نہیں ہو سکتے۔

درخواست میں یہ بھی مؤقف اپنایا گیا کہ دونوں کی عدم پیشی سے ٹرائل متاثر نہیں ہوگا۔ عدالت سے استدعا ہے کہ عدالت شہبازشریف اور حمزہ شہباز کی آج کی حاضری معافی کی درخواست منظور کرے۔

احتساب عدالت نے شہباز شریف کی آشیانہ جبکہ حمزہ شہباز کی دو ریفرنسز میں حاضری معافی کی درخواست منظورکرتے ہوئے سماعت 17 جولائی تک ملتوی کردی۔

احتساب عدالت میں آشیانہ اوررمضان شوگر مل ریفرنس کی سماعت مقرر تھی۔

وزیراعظم شہبازشریف کو نیب کے دو ریفرنسز پرجبکہ وزیراعلی حمزہ شہباز کو رمضان شوگر مل ریفرنس میں پیش ہونا تھا۔

مسلم لیگ ن کی لیگل ٹیم نے ان کی حاضری معافی کی درخواستیں تیارکیں جس کے مطابق شہبازشریف اور حمزہ شہباز عدالت میں پیش نہیں ہوں گے۔

واضح رہے کہ وزیراعظم شہبازشریف کو رمضان شوگر مل ریفرنس میں مستقل حاضری سے استثنیٰ مل چکا ہے۔

عدالت نے آشیانہ ریفرنس میں شہبازشریف کی مستقل حاضری معافی کی درخواست پر وکلا کو دلائل کے لیے طلب کر رکھا تھا۔