وزیراعلیٰ سندھ مراد علی شاہ نے کہا ہے کہ کراچی کی موجودہ حالت کی ذمہ دار ہم سمیت دیگر حکومتیں ہیں۔

تفصیلات کے مطابق وزیراعلیٰ سندھ مراد علی شاہ نے اپنے بیان میں کہا ہے کہ میں کراچی میں پیدا ہوا، آج سے20 سال قبل میں کہہ سکتا تھا کہ کراچی کا ہر کونہ جانتا ہوں۔

انہوں نے کہا کہ 20 سے 30 سال کے دوران کراچی بہت بڑھا ہے اور حالت خراب بھی ہوئی، کراچی کی موجودہ حالت کی ذمہ دار ہم سمیت دیگر حکومتیں ہیں، بہت کچھ ہو سکتا ہے، ہم بہترکرسکتے ہیں۔

اس سے قبل وزیراعلیٰ سندھ مراد علی شاہ نے تاجروں سے خطاب کرتے ہوئے کہا تھا کہ سب سے زیادہ بارش 2020 میں ہوئی، ریکارڈ ہے، لوگ یہ سمجھے برسات میں پانی کہیں نہیں آئے گا ایسا ممکن نہیں، عوامی مسائل حل کرنے کیلئے اقدامات کر رہے ہیں۔

انہوں نے کہا تھا کہ بہترمنصوبہ بندی نہ ہونے کی وجہ سے کراچی کے مسائل بڑھے، نقل مکانی کی وجہ سے کراچی کی آبادی میں تیزی سے اضافہ ہوا، اختیارات کی نچلی سطح تک منتقلی چاہتا ہوں۔

مراد علی شاہ نے کہا تھا کہ جہاں پر2 منزلہ مکان تھے وہاں 20،20 منزلہ بلڈنگز بنائی گئیں، انفراسٹرکچر 2 منزلوں کا تھا، بلڈنگز20 منزلہ بن گئیں،ہماری غلطی ہے، کراچی کے مسائل کے ہم سب قصوروار ہیں۔

وزیراعلیٰ سندھ نے کہا تھا کہ ہم نے کام شروع کیا تو مسائل کھڑے ہو گئے، 22 شاہراہیں ڈیوولوشن کے دور میں کمرشلائز کی گئیں۔