حالیہ سیاسی صورتحال پر چیئرمین پیپلز پارٹی بلاول بھٹو نے ہنگامی اجلاس آج طلب کرلیا ہے۔

تفصیلات کے مطابق چیئرمین پیپلز پارٹی بلاول بھٹو زرداری کی صدارت پیپلز پارٹی کی سینٹرل ایگزیکٹو کمیٹی کا ہنگامی اجلاس آج شام 4 بجے ہوگا۔

پیپلز پارٹی کی سینٹرل ایگزیکٹو کمیٹی پنجاب ضمنی انتخابات کے نتائج کے بعد کی سیاسی صورتحال کا جائزہ لے گی جبکہ ہائبرڈ اجلاس میں بلاول ہاؤس کراچی میں ارکان سی ای سی شرکت کرینگے۔

پیپلز پارٹی سی ای سی ارکان ویڈیو لنک کے زریعے آن لائن بھی اجلاس میں شرکت کرینگے۔

 پنجاب کے ضمنی انتخاب کے بعد ملکی موجودہ سیاسی صورتحال پر ارکان سینٹرل ایگزیکٹو کمیٹی سے تجاویز طلب کی گئی ہیں۔

واضح رہے کہ پنجاب کے 20 حلقوں میں ہونے والے ضمنی انتخابات کے غیر حتمی اور غیر سرکاری نتائج کے مطابق پاکستان تحریک انصاف نے 15 نشستیں اپنے نام کرلی ہیں جب کہ مسلم لیگ (ن) کو صرف 3 سیٹوں پر کامیابی ملی اور ایک سیٹ آزاد امیدوار کے حصے میں آئی۔

پنجاب میں پی ٹی آئی اتحاد کو سادی اکثریت حاصل ہوگئی ہے اور یوں پنجاب کے وزارت اعلیٰ کی سیٹ اب تحریک انصاف کے امیدوار کی ہی ہوگی، پی ٹی آئی اتحاد نے 186 نشستیں حاصل کرلی ہیں، پنجاب میں پی ٹی آئی کی 176 اور مسلم لیک (ق) کی 10 نشستیں ہیں۔

پولنگ صبح آٹھ بجے شروع ہوئی جو بغیر کسی وقفے کے پانچ بجے تک جاری رہی، اس موقع پر سیکیورٹی کے سخت انتظامات کیے گئے تھے،  صوبے کے 14 اضلاع کے ضمنی انتخابات میں 175 امیدوار آمنے سامنے ہیں۔