صدر مملکت نے عوام کو بااختیار بنانے کے لیے جمہوری اصولوں کو قائم کرنے کے عزم کا اعادہ کیا ہے۔

ڈاکٹر عارف علوی نے نیلسن منڈیلا کے عالمی دن کے موقع پرانہیں خراج عقیدت پیش کرتے ہوئے ایک پیغام جاری کیا ہے۔

انہوں نے کہا ہے کہ نیلسن منڈیلا نےپنے ملک میں نسلی امتیاز پر مبنی نظام کے خلاف لڑنے پر 27 سال جیل میں گزارے اور ثابت کیا کہ ہم سب میں نسل پرستی، امتیازی سلوک اور عدم مساوات کے خلاف لڑنے کی صلاحیت موجود ہے۔

انہوں نے بتایا کہ نیلسن منڈیلا نے اکثریت کے باوجود جنوبی افریقہ کی سفید فام آبادی کو عدم امتیاز کی یقین دہانی اور جنوبی افریقہ کے صدر کی حیثیت سے انہوں نے معافی اور مفاہمت پر زور دیا۔

صدر پاکستان کا کہنا تھا کہ ہمیں بھی چاہیئے کہ ہم نیلسن منڈیلا کی مثال اور وژن سےسبق حاصل کریں ، نفرت کے خلاف آواز اٹھائیں۔

ڈاکٹر عارف علوی نے کہا کہ آج ہم اپنے ملک اور لوگوں کو بااختیار بنانے کے لیے جمہوری اصولوں کو قائم کرنے کے ساتھ رواداری، جامع اور جمہوری فیصلہ سازی، اظہار رائے کی آزادی قائم کرنے کا عزم بھی  کرتے ہیں۔

ان کا کہنا تھا کہ آج ہم قانون کے سامنے برابری اور سماجی انصاف کے لیے اپنے عہد کی  بھی تجدید کرتے ہیں۔

خیال رہے نیلسن منڈیلا آزادی، امن اور سماجی انصاف کے حصول کیلئے جرات، ہمدردی اور عزم کی مثال ہیں وہ ایک بااصول رہنما تھے ، آزادی کیلئے جان قربان کرنے کیلئے بھی تیار تھے۔