حافظ سعد حسین رضوی نے کہا ہے کہ تحریک انصاف،ن لیگ اور پیپلز پارٹی ایک سکے کے دو رخ ہیں۔

امیر تحریک لبیک پاکستان حافظ سعد حسین رضوی نے موجودہ ضمنی الیکشن پر اپنے ایک بیان میں کہا کہ تحریک لبیک ضمنی انتخابات میں گیم چینجر کے طور پر اُبھر کر سامنے آئے گی۔

انہون نے کہا کہ شفاف اور منصفانہ انتخابات پر ہی یقین رکھتے ہیں ، اپنے حق کے لیے آخری حد تک جائیں گے۔

ان کا کہنا تھا کہ جمہوریت کے نام پر سسٹم سے کھلواڑ کیا جارہا ہے، تحریک انصاف،ن لیگ اور پیپلز پارٹی ایک سکے کے دو رخ ہیں۔

حافظ سعد حسین رضوی کا یہ بھی کہنا تھا کہ آنکھوں کے ساتھ دل کے اندھوں سے واسطہ ہے، چہرے نہیں نظام بدلنے کی ضرورت ہے۔

انہوں نے کہا کہ اقتدار کی چھینا جھپٹی میں سیاست دان اس قدر گر چکے کہ اخلاقی اقدار ہی بھول گئے ہیں، عوامی طاقت سے فرسودہ نظام کو جڑ سے اُکھاڑ پھینکیں گے۔

امیر تحریک لبیک پاکستان نے یہ بھی کہا کہ غریب اور طاقتور کو ایک ہی صف میں دیکھنا چاہتے ہیں جبکہ اپنے آنے والی نسلوں کو مضبوط اور مستحکم پاکستان دینا چاہتے ہیں۔

ان کا کہنا تھا کہ معاشی چیلنجوں سمیت ہر چیلنج سے مقابلے کی صلاحیت رکھتے ہیں، سیاستدان غلیظ اور گھٹیا زبان کے استعمال سے گریز کریں۔

حافظ سعد حسین رضوی کا یہ بھی کہنا تھا کہ آئین اور قانون ہر لحاظ سے مقدم ہے، کوئی یہ مت سوچے کہ وہ ہماری آواز کودبا دے گا۔

امیر تحریک لبیک پاکستان حافظ سعد حسین رضوی کا مزید کہنا تھا کہ سیاسی حریف ٹی ایل پی کو اب پہلے سے مختلف پائیں گے، پنجاب کے ضمنی الیکشن میں جھرلو نہیں پھیرنے دیں گے۔