پنجاب میں ہونے والے ضمنی انتخابات کے لیے سکیورٹی کے انتظامات مکمل کرلیے گئے ہیں۔

تفصیلات کے مطابق پنجاب پولیس کی جانب سے ضمنی انتخابات کے پرامن انعقاد کے لیے تیاریاں مکمل کرکے کنٹرول روم قائم کردئے گئے ہیں۔

آی جی پنجاب کا کہنا ہے کہ 14 اضلاع کے 20 حلقوں میں سکیورٹی کے فول پروف انتظامات یقینی بنائے جائیں گے جبکہ ضمنی انتخابات کے 3100 سے زائد پولنگ اسٹیشنز پر 52 ہزار سے اہلکار و افسران تعینات کیے گئے ہیں۔

 آئی جی پنجاب نے بتایا کہ خواتین کے پولنگ اسٹیشنز پر لیڈی پولیس اہلکار سکیورٹی کے فرائض سر انجام دیں گی جبکہ لاہور کے 4 حلقوں میں 9 ہزار سے زائد اہلکار تعینات ہوں گے اور سیف سٹی کیمرے مانیٹرنگ میں مدد دینگے۔

آئی جی پنجاب کا کہنا تھا کہ اسلحے کی نمائش، پرائیویٹ مسلح افراد، بینر اور مخالفین کے کیمپس اکھاڑنے اور لڑائی جھگڑے کرنے والوں کے خلاف بلا امتیاز کارروائی ہوگی۔

آئی جی پنجاب نے بتایا کہ انتخابی سامان اور بیلٹ پیپرز کی بحفاظت ترسیل کو ہر صورت یقینی بنایا جائے گا جبکہ ہر انتخابی حلقے میں اینٹی رائٹس فورس اور ایلیٹ فورس کے جوان الرٹ رہیں گے۔

 آئی جی پنجاب کا مزید کہنا تھا کہ اسپیشل برانچ اور حساس ادارے ڈیوٹی پر مامور اہلکار و افسران کی کارکردگی کی خفیہ نگرانی کریں گے۔