محکمہ موسمیا ت نے آج کراچی میں دن بھرموسلادھاربارش کاسلسلہ جاری رہنے کی پیشگوئی کی ہے۔

محکمہ موسمیات کا کہنا ہے کہ کراچی کو بارش برسانے والے بادلوں نے اپنی لپیٹ میں لیا ہوا ہے، اس لیے مختلف علاقوں میں دن بھر موسلا دھار بارش ہو سکتی ہے۔

 بحیرۂ عرب سے مسلسل بارش برسانے والے بادل شہر کی جانب بڑھ رہے ہیں، ٹھٹھہ، بدین اور کیٹی بندر سے بادلوں کے آنے کا سلسلہ بھی جاری ہے۔

 شہر میں مزید 2 سے 3 گھنٹے بارش کا سلسلہ جاری رہ سکتا ہے۔

شہر قائد میں بارش کی صورتحال

کراچی کے مختلف علاقوں میں بارش کے بعد اہم شاہراہیں زیرآب ہیں ، آئی آئی چند ریگر روڈ پرسیلابی صورتحال،چھوٹی گاڑیوں کاچلنا ناممکن ہو گیا۔

اس کے علاوہ سندھ اسمبلی،ہائیکورٹ،سپریم کورٹ کےسامنےکی سڑکیں بھی تالاب بن گئیں۔

صدر،نیپا،یونیورسٹی روڈ،پیپلزچورنگی،جمشیدروڈپرپانی جمع ہوگیا۔

یہ بھی پڑھیں: بارش برسانے والا مضبوط سسٹم کراچی کی جانب بڑھنے لگا

لیاقت آباد سےغریب آباد جانے والا راستہ تالاب کا منظر پیش کررہاہے۔

اسٹیڈیم سے سائٹ جانےوالے انڈرپاسز میں بھی پانی بھرگیا۔

کراچی میں پی ای سی ایچ ایس بلاک 6 میں بارش کا پانی گھروں میں داخل ہوگیا، گلیاں اور سڑکیں بھی مکمل طور پرزیر آب آگئیں۔

 مختلف علاقوں میں مسلسل بارش، ٹریفک کی روانی متاثر

بارش کا پانی سڑکوں پر جمع ہونے کے باعث ٹریفک کی روانی متاثر رہی اور کئی گاڑیاں اور موٹرسائیکلیں بند ہوگئیں جس کے باعث شہریوں کو پریشانی کا سامنا کرنا پڑا۔

کلفٹن سب میرین انڈر پاس اور کے پی ٹی انڈر پاس بھی بند کردیے گئے جبکہ لیاقت آباد سی ون ایریا میں بارش کا پانی گھروں میں داخل ہوگیا۔

شدید بارش کے بعد ملیر ندی یار محمد گوٹھ میں پانی کا ریلہ داخل ہوگیا، جس کے باعث شہریوں کو نقل مکانی کرنا پڑی۔

ملیر ندی لنک روڈ کو بھی پانی آنے کے باعث بند کردیا گيا ہے۔