ترجمان دفترخارجہ عاصم افتخار نے کہا ہے کہ ہم بھارتی وزیر دفاع کی جانب سے بے بنیاد متعصبانہ ردعمل کو مسترد کرتے ہیں۔

 تفصیلات کے مطابق ترجمان دفترخارجہ عاصم افتخار احمد نے صحافیوں کو ہفتہ وار بریفنگ دیتے ہوئے کہا ہے کہ وزیر خارجہ شنگھائی تعاون تنظیم وزرائے خارجہ کونسل کے اجلاس کے سلسلے میں تاشقند میں ہیں۔

انہوں نے کہا کہ اجلاس میں کورونا کے باعث افراط زر میں اضافہ، غربت میں اضافہ اور پیداوار میں کمی کا جائزہ لیا گیا، وزیر خارجہ نے چین،روس،قازقستان ، کرغیزستان ، تاجکستان سمیت متعدد ممالک کے ہم منصب سے ملاقاتیں کیں۔

   وزیر مملکت حنا ربانی کھر نےڈی ایٹ اجلاس بنگلہ دیش میں پاکستان کی نمائندگی کی، انہوں نے علاقائی تعاون کے فروغ کی ضرورت پر زور دیا، سی پیک کی صورت میں جیو اکنامک ایسٹ کو جلد جیو اکنامک منافع میں تبدیل ہونے کی نشاندہی کی۔

عاصم افتخار نے کہا کہ ہم بھارتی وزیر دفاع کی جانب سے بے بنیاد متعصبانہ ردعمل کو مسترد کرتے ہیں، یہ بیان بھارت کی جانب سے جنوبی ایشیا میں سی پیک کی شکل میں جاری  سوشیو اکنامک ایجنڈا کے خلاف جاری ناکام کوشیشوں کا حصہ ہے۔

ترجمان دفترخارجہ نے کہا کہ چنائی میں شطرنج اولمپیاڈ کے لیے ٹارچ جو مقبوضہ کشمیر کے متنازع علاقے سے گزارے اس کو مسترد کرتے ہیں، احتجاج کے طور پر پاکستان شطرنج اولمپیاڈ میں شرکت نہیں کرے گا۔

انہوں نے کہا کہ بھارت نے جان بوجھ کر ایک صحت مند سرگرمیوں کو اپنی سیاسی مقاصد کے حصول کے لیے استعمال کرنے کی کوشش کی۔