جامعہ کراچی میں خودکش حملہ کیس کے ماسٹر مائنڈ کا جسمانی ریمانڈ منظورکر لیا گیا۔ 

تفصیلات کے مطابق کراچی میں انسداد دہشت گردی عدالت کراچی یونیورسٹی چائنیر پر خود کش حملہ کیس کی سماعت ہوئی جس میں پولیس نے گرفتار مبینہ سہولت کار اور ماسٹر مائنڈ ملزم داد بخش کو عدالت میں پیش کیا۔

منتظم جج نے ملزم داد بخش کو 16 جولائی تک کے جسمانی ریمانڈ پر پولیس کے حوالے کردیا۔

پولیس کا کہنا ہے کہ ملزم بی ایل اے اور بی ایل ایف کراچی کا کمانڈر ہے۔ ملزم کراچی یونیورسٹی میں چائنیز استائذہ پر خود کش حملے کا ماسٹر مائنڈ ہے۔

پولیس کے مطابق ملزم داد بخش کراچی میں چائنیز پرحملوں میں سہولت کاری کا کام کرتا تھا۔ ملزم کو گزشتہ روز سی ٹی ڈی نے گرفتار کیا تھا۔

واضح رہے کہ رواں برس 26 اپریل کو خاتون خودکش بمبار نے جامعہ کراچی میں چینی اساتذہ کی وین کے قریب خود کو دھماکے سے اڑا لیا تھا۔

خود کش حملے کے نتیجے میں 3 چینی اساتذہ سمیت 4 افراد جاں بحق ہوئے تھے۔

کھارادردھماکا کیس

پولیس نے کھارا دردھماکا کیس کے تین ملزمان کو کراچی کی انسداد دہشت گردی کورٹ میں پیش کردیا۔

پولیس نے عدالت سے استدعا کی کہ ملزم دلبر، عبدالقیوم اورعبدالستار سے تفتیش مکمل نہیں ہوئی، مذید ریمانڈ دیا جائے جس پرعدالت نے ملزموں کے جسمانی ریمانڈ میں 14 جولائی تک توسیع کردی۔

واضح رہے کہ کھارا دردھماکے میں ایک خاتون جاں بحق ہوئی تھیں۔