رہنما پاکستان تحریک انصاف فواد چوہدری نے کہا ہے کہ نومنتخب وزیراعلی پنجاب چوہدری پرویزالہیٰ اسلام آباد میں حلف اٹھائیں گے اوران کی تقریبِ حلف برداری ایوان صدرمیں منعقد کی جائے گی۔

چوہدری پرویزالہٰی گورنرہاؤس پنجاب سے خصوصی طیارے میں اسلام آباد کے لیے روانہ ہوگئے ہیں۔

ایوان صدرکے ذرایع کا کہنا ہے نومنتخب وزیراعلیٰ آج رات دوبجے ایوان صدرمیں ہونے والی تقریب میں اپنے عہدے کا حلف اٹھائیں گے۔

اس ضمن میں ایوان صدرمیں تقریبَ حلف برداری کی تیاریاں شروع کردی گئیں ہیں۔

ذرایع کا کہنا ہے کہ گورنرپنجاب نے سپریم کورٹ کے احکامات کی کھلم کھلا خلاف ورزی کرتے ہوئے حلف لینے سے انکارکردیا ہے، جس کے بعد سپریم کورٹ کے احکامات کے مطابق گورنرکے انکارپرصدرپاکستان چوہدری پرویزالہٰی کا حلف لیں گے۔

ذرایع کے مطابق گورنرپنجاب بلیغ الرحمان کی جانب سے چوہدری پرویزالہیٰ سے حلف لینے سے انکارپرصدرپاکستان کی جانب سے ویڈ لنک کے ذریعے نومنتخب وزیراعلی پنجاب سے حلف لیںے کا کہا گیا تھا تاہم اب اس پروگرام میں تبدیلی کردی گئی ہے۔

یہ بھی پڑھیں :ڈپٹی اسپیکر کی رولنگ غیر آئینی قرار، حمزہ کابینہ فارغ، پرویز الہیٰ نئے وزیراعلیٰ پنجاب

ذرایع کے مطابق گورنرہاؤس کے دروازے بند کرکے کسی کوبھی اندر جانے کی اجازت نہیں دی جارہی تھی، جب کہ چوہدری پرویزالہیٰ کوبھی مرکزی گیٹ پرروک لیا گیا تاہم وہ عقبی دروازے سے اندرپہنچ گئے تھے اوروہیں سے اسلام آباد کے لیے روانہ ہوئے۔

اس صورت حال کو دیکھتے ہوئے گورنرہاؤس کا عملہ بھی مشکل کا شکارہوگیا ہے اورسیکیورٹی اسٹاف کی پی ایس اوٹوگورنرسے مزید سیکیورٹی طلب کرنے کی درخواست کردی ہے۔

جب کہ گورنرہاؤس کے باہراراکین اسمبلی اورکارکنوں کی بڑی تعداد جمع ہوگئی ہے جو’ گوگورنرگو‘ کے نعرے لگا رہے ہیں۔