صوبائی وزیر کامران بنگش کا کہنا ہے کہ سرکاری جامعات کو تحقیق کے لحاظ سے بہتر بنانے پر توجہ دے رہے ہیں۔

صوبائی وزیر اعلیٰ تعلیم کامران بنگش نے پشاور میں افتتاحی تقریب سے خطاب کرتے ہوئے کہا کہ صوبے کی آٹھ یونیورسٹیاں جلد گلوبل ریکنگ میں آجائیں گی۔

کامران بنگش نے مزید کہا کہ پبلک سیکٹر یونیورسٹیوں کو معاشی معاملات میں خودمختار بنا رہے ہیں، سرکاری جامعات کو تحقیق کے لحاظ سے بہتر بنانے پر توجہ دے رہے ہیں۔

اس سے قبل وزیراعلیٰ خیبر پختونخوا محمود خان نے نو تعمیر شدہ اکیڈمک بلاک، ایڈمن بلاک، پبلک ہیلتھ ریفرنس لیب سمیت مختلف ترقیاتی منصوبوں کا افتتاح کیا۔

اس حوالے سے محمود خان نے کہا کہ یہ منصوبے مجموعی طور تقریباً 69 کروڑ روپے کی لاگت سے مکمل کئے گئے ہیں، پبلک ہیلتھ ریفرنس لیبز صوبے میں اپنی نوعیت کی  پہلی لیبز ہیں، ان لیبارٹریوں کے قیام سے مختلف بیماریوں کے پیچیدہ ٹیسٹس صوبے ہی میں کئے جائیں گے۔

انہوں نے مزید کہا کہ اس سے قبل کانگو بخار سمیت مختلف بیماریوں کے ٹیسٹس اسلام آباد یا کراچی سے کروائے جاتے تھے۔

واضح رہے کہ اس موقع پر صوبائی کابینہ اراکین تیمور سلیم جھگڑا، کامران بنگش اور بیرسٹر محمد علی سیف بھی وزیر اعلیٰ کے ہمراہ موجود تھے۔