بلدیاتی انتخابات کے دوسرے مرحلے کو روکنے کے لیے ایم کیوایم پاکستان نے عدالت میں درخواست دائرکردی۔

تفصیلات کے مطابق سندھ میں بلدیاتی انتخابات کے دوسرے مرحلے کے معاملے پر ایم  کیو ایم پاکستان نے سپریم کورٹ رجسٹری کراچی میں درخواست دائر کی۔

ایم کیوایم نے درخواست کی فوری سماعت کے لیے دوبارہ سپریم کورٹ سے رجوع، درخواست بیرسٹر ڈاکٹر فروغ نسیم کے توسط سے دائر کی گئی ہے۔

ایم کیوایم نے سندھ ہائی کورٹ میں درخواست مسترد ہونے کے بعد سپریم کورٹ سے رجوع کیا تھا جس میں مؤقف اختیار کیا گیا کہ قانون سازی سے قبل سندھ میں بلدیاتی انتخابات روکنے کا حکم دیا جائے۔

ایم کیو ایم پاکستان نے درخواست سماعت کے لیے 20 جولائی کو اسلام آباد میں مقرر کرنے کی استدعا کی ہے۔

پی پی کے رہنماؤں کی ضمانت میں توسیع

دوسری جانب احتساب عدالت سکھر میں پی پی کے رہنماؤں کی ضمانت میں توسیع کر دی گئی ہے جن میں اویس شاہ، رمیش لعل، ضیاء لنجار، سردار چانڈیو اور دیگرکے نام شامل ہیں۔

احتساب عدالت سکھر نے تمام درخواستوں پر 15 اگست تک عبوری ضمانت میں توسیع کی جبکہ ایم این اے رمیش لعل ، سابق صوبائی وزیر اویس قادر شاہ اور دیگرعدالت میں پیش ہوئے۔

پی پی رہنماؤں کے خلاف نیب کی جانب سے آمدن سے زائد اثاثہ جات کی تحقیقات جاری ہیں۔

ضیا لنجار، رکن صوبائی اسمبلی سردار چانڈیو برہان چانڈیو نے بھی قبل از گرفتاری ضمانت حاصل کررکھی ہے۔