ترجمان دفتر خارجہ عاصم افتخار نے کہا ہے کہ بھارت مقبوضہ کشمیر میں انسانی حقوق کی خلاف ورزیوں میں ملوث ہے۔

تفصیلات کے مطابق بھارتی فوج کی جانب سے پاکستان پر بے بنیاد الزامات کے ڈوزیئر پر ترجمان دفتر خارجہ عاصم افتخار نے رد عمل دیتے ہوئے کہا ہے کہ بھارتی میڈیا پر فوج کے نام نہاد اور بے بنیاد ڈوزیئر کی رپورٹس دیکھی ہیں۔

انہوں نے کہا کہ رپورٹس میں مقبوضہ کشمیر میں دہشت گردانہ کارروائیوں میں پاکستان پر الزام لگایا گیا، پاکستان ان بے بنیاد الزامات اور ڈوزیئر کو مسترد کرتا ہے، جھوٹے، من گھڑت اور نام نہاد ڈوزیئر کو بجا طور پر مسترد کرتے ہیں۔

  عاصم افتخار نے کہا ہے کہ بھارتی فوج کا ڈوزیئر غلط معلومات، جعلی دعوے اور انتشار کے تحت تیار کیا گیا، بھارت ایسی بے بنیاد رپورٹس سے کشمیر پر مظالم سے دنیا کی توجہ ہٹانا چاہتا ہے۔

  ترجمان دفتر خارجہ نے کہا کہ بھارت مقبوضہ کشمیر میں بڑے پیمانے پر انسانی حقوق کی خلاف ورزیوں میں ملوث ہے، مقبوضہ کشمیر میں تشدد کرنے والوں کا بی جے سے رابطوں کا انکشاف ہوا ہے۔

انہوں نے کہا کہ پاکستان نے عالمی برادری کو مقبوضہ کشمیر میں بھارتی دہشتگردی کے جامع شواہد کے ڈوزیئر شیئر کیے ہیں، ہم نے ہندوستان کی پاکستان میں دہشتگردانہ سرگرمیاں، منصوبہ بندی اور مالی معاونت کی شکل میں پیش کیا۔

  عاصم افتخار نے کہا ہے کہ بھارت نے اپنی ناکامیوں سے توجہ ہٹانے کے لیے فرضی اکاؤنٹس استعمال کیے، ہندوستان کو اپنے گھر کو ترتیب دینے کے مقصد سے خود شناسی کرنے کا مشورہ دیا جائے گا۔

ترجمان دفتر خارجہ نے کہا کہ پاکستان پر دہشت گردی سے متعلق بے بنیاد الزامات لگانے کی بھارتی چالیں بےنقاب ہو رہی ہیں، پاکستان خود دہشتگردی کا شکار رہا ہے۔