کورونا وائرس کے کیسز میں اضافے کے پیش نظر وزیر برائے صحت نے عوام سے بوسٹر لگوانے کی اپیل کردی ہے۔

وفاقی وزیر صحت عبدالقادر پٹیل نے اپنے ایک بیان میں کہا کہ عیدالاضحی کے موقع پر کوویڈ 19کے پھیلاؤ کو روکنے کیلئے کورونا ایس او پیز پر سختی سے عمل کیا جائے۔

انہوں نے کہا کہ عوام کوچاہیے کہ وہ رش والی جگہوں پر نہ جائیں، ماسک پہنیں اور ایک دوسرے سے فاصلے پر رہیں۔

عبدالقادر پٹیل نے یہ بھی کہا کہ مذہبی اسکالرز کی بھی ذمہ داری ہے کہ وہ مساجد میں ایس او پیز پر عمل کو یقینی بنائیں جبکہ عوام عید کی نماز کے بعد ایک دوسرے سے گلے ملنے اور ہاتھ ملانے سے گریز کریں۔

وفاقی وزیر صحت نے عوام پر زور دیا کہ وہ بوسٹر ڈوز لگوائیں کیونکہ ملک میں کورونا کے پھیلاؤ کی شرح میں اضافہ کا رجحان ہے۔

انہوں نے کہا کہ حکومت اس حوالہ سے جامع حکمت عملی کے تحت اقدامات کو یقینی بنا رہی ہے تاہم عوام کی بھی ذمہ داری ہے کہ قربانی کرتے وقت احتیاطی تدابیر پر عمل کریں کیونکہ وائرس کے پھیلاؤ پر قابو پانے کے حوالہ سے احتیاط بہترین راستہ ہے۔

عبدالقادر پٹیل نے شہریوں کو ہدایت کی کہ قصابوں کو دستانے استعمال کرنے کا کہیں اور جانورون کی قربانی کے بعد اچھی طرح ہاتھ دھوئیں۔

وفاقی وزیر صحت عبدالقادر پٹیل کا مزید کہنا تھا کہ عید الاضحیٰ کی چھٹیوں کے دوران صحت کی ہدایات پر سختی سے عمل کیا جائے اور غیر ضروری سفر سے اجتناب کیا جائے تاکہ کورونا وائرس کے پھیلائو کو کم سے کم کیا جا سکے۔