کراچی میں تیز بارشوں کے باعث سیلابی صورتحال کا خطرہ بتایا جارہا ہے۔

تفصیلات کے مطابق شہر قائد کے مختلف علاقوں میں رات گئے سے اب تک ہلکی بارش کا سلسلہ جاری ہے، جس کے بعد شہر کا موسم خوشگوار ہوگیا ہے۔

محکمہ موسمیات کا کہنا ہے کہ گلبرگ، لیاقت آباد، ایم اے جناح روڈ اور آئی آئی چندریگر روڈ پر وقفے وقفے سے بوندا باندی کا سلسلہ جاری ہے۔

محکمہ موسمیات نے بتایا کہ لانڈھی، کورنگیِ نصیر آباد، یونیورسٹی روڈ، ملیر، پی آئی بیاور ناظم آباد میں بھی  ہلکی بارش ہورہی ہے۔

محکمہ موسمیات نے کہا کہ  شہر کا موجودہ درجہ حرارت 28 ڈگری سینٹی گریڈ ہے جبکہ دن میں درجہ حرارت 28 سے 30 ڈگری سینٹی گریڈ تک رہے گا۔

محکمہ موسمیات کا کہنا ہے کہ شہر میں چند گھنٹوں  کے دوران گرج چمک کے ساتھ تیز بارش کا امکان ہے جبکہ تیز بارشوں کے باعث شہری علاقوں میں بھی سیلابی صورتحال پیدا ہوسکتی ہے۔

محکمہ موسمیات کا مزید کہنا ہے کہ سندھ بھر سمیت کراچی میں موسلادھار بارشوں کے سبب اربن فلڈنگ کا بھی اندیشہ ہے جس کے سبب محکمہ موسمیات نے  تمام متعلقہ اداروں کو احتیاطی تدابیر اختیار کرنے اور ہائی الرٹ رہنے کی ہدایت کردی ہے۔

واضح رہے کہ محکمہ موسمیات نے خبردار کیا ہے کہ سندھ بھر میں مون سون کے نئے سسٹم کے تحت تیز آندھی اور گرج چمک کے ساتھ موسلا دھار بارشوں کا امکان ہے، ایسے موسم میں شہری  احتیاطی تدابیر اختیار کرنے کے ساتھ ساتھ درختوں، سائن بورڈز اور بجلی کے کھمبوں سے دور رہیں۔