چیئرمین جمعیت علماء کونسل مولانا طاہر اشرفی نے کہا ہے کہ سعودی حکومت نے حج کے بہترین انتظامات کیے ہیں۔

چیئرمین جمعیت علماء کونسل مولانا طاہر اشرفی نے پریس کانفرنس کرتے ہوئے کہا ہے کہ جو پاکستانی سعودی عرب میں ہیں وہ سعودی حکومت کی اجازت کے بغیر حج کرنے نہ جائیں، ایسا نہ ہو سعودی حکومت گرفتار کرلے اور پریشانی بن جائے۔

انہوں نے کہا کہ جمعہ کو حجاج عرفات میں جمع ہوں گے، اپیل ہے حجاج سیاسی سرگرمیوں سے گریز کریں، تاجروں سے کہتا ہوں عید پر ذخیرہ اندوزی یا مہنگائی سے اجتناب کریں۔

 مولانا طاہر اشرفی نے کہا ہے کہ سپہ سالار نے پاکستانی فوج کو واضح ہدایات دی ہیں کہ ان کے ادارے سے کوئی بھی سیاسی سرگرمیوں سے پرہیز کریں، میں سپہ سالار کے اس اقدام کا شکرگزار ہوں۔

 چیئرمین جمعیت علماء کونسل نے کہا کہ اگر کسی کے پاس کوئی ثبوت ہے تو وہ جی ایچ کیو جا کر جمع کروائے لیکن سوشل میڈیا سے گریز کرے، پنجاب کے انتخابات میں پاکستان علماء کونسل اپنے ساتھیوں کے ساتھ رابطے میں ہیں۔

انہوں نے کہا کہ محرم الحرام کے حوالے سے جلد ضابطہ اخلاق قوم کے سامنے لائیں گے، سعودی حکومت نے حج کے بہترین انتظامات کیے ہیں جس پر ہم ان کے شکرگزار ہیں۔

  مولانا طاہر اشرفی نے کہا ہے کہ سعودی عرب اور ملائیشیا کے تعاون سے ہونے والی کانفرنس میں کشمیر کا موقف واضح طور پر رکھا۔