ترجمان پی ڈی ایم حافظ حمداللہ نے کہا ہے کہ عمران خان نے ہمیشہ اداروں کی توہین اور تضحیک کی ہے۔

تفصیلات کے مطابق ترجمان پی ڈی ایم حافظ حمداللہ نے عمران نیازی کے بیان پر ردعمل دیتے ہوئے کہا ہے کہ عمران نیازی کا ریاستی اداروں سے سیاست میں مداخلت کا مطالبہ آئین سے انحراف ہے۔

انہوں نے کہا کہ ادارے نیوٹریلٹی کا فیصلہ کرچکے ہیں جو کہ آئینی تقاضا ہے، ادارے آئین پاکستان کے تابع ہیں، عمران نیازی کے نہیں، عمران نیازی سابق ڈپٹی اسپیکر، اسپیکر قومی اسمبلی اور صدر عارف علوی سمیت آئین شکن ثابت ہوئے ہیں۔

حافظ حمداللہ نے کہا ہے کہ تم نے ہمیشہ اداروں کی توہین اور تضحیک کی ہے، اداروں کو بلیک میل نہیں کیا جاسکتا، عمران نیازی تحریک انصاف کے نہیں تحریک فساد کے سربراہ ہیں۔

ترجمان پی ڈی ایم نے کہا کہ پی ڈی ایم کا فیصلہ ہے کہ پاکستان کے استحکام کے لیے عمرانی فتنے کا خاتمہ ضروری ہے، ملکی سالمیت اور بقاء عوامی راج، آئین کی بالادستی اور پارلیمنٹ کی سپریمیسی میں ہے۔

انہوں نے کہا کہ آئین، قانون، جمہوریت اور پارلیمنٹ کی بالادستی پر کمپرومائز کا سوال پیدا نہیں ہوتا، عمران نیازی ملک کو بنی گالہ نہ سمجھیں یہ 22 کروڑ عوام کا ملک ہے۔

 حافظ حمداللہ نے کہا ہے کہ ملک میں انتخابات کب اور کس وقت ہونگے یہ فیصلہ اتحادی حکومت اور الیکشن کمیشن مل کے کریں گے، جب بھی ریاستی اداروں نے سیاست میں مداخلت کی ہے اس سے ملک کو نقصان ہوا ہے۔