وزیر صحت و خزانہ تیمور سلیم جھگڑا نے قبائلی عوام کیلئے صحت کارڈ کا اعلان کر دیا ہے۔

تفصیلات کے مطابق وزیر صحت و خزانہ تیمور سلیم جھگڑا نے کہا ہے کہ ساٹھ لاکھ افراد کیلئے صوبائی حکومت اپنی جیب سے اخراجات برداشت کرے گی، آج ہی اسٹیٹ لائف انشورنس کارپوریشن کیساتھ خط و کتابت ہوگی۔

انہوں نے کہا کہ چند دنوں میں قبائلی عوام صوبے کے صحت کارڈ پلس پروگرام پر متنقل ہوجائینگے، قبائلی عوام کیلئے مفت علاج کا جو قدم عمران خان نے اُٹھایا تھا آج محمود خان کی قیادت میں صوبائی حکومت اُسے پورا کرنے جارہی ہے۔

تیمور سلیم جھگڑا نے کہا کہ امپورٹڈ حکومت نے آتے ہی یہ حق چھیننا چاہا لیکن قبائلی عوام کیلئے صوبائی حکومت لڑے گی، ہم نے ہر طرح سے وفاقی حکومت کو آگاہ کیا لیکن وہ تاحال مانے نہیں، ہم فوری طور پر قبائلی عوام کو صحت کارڈ پلس میں شامل کررہے ہیں۔

اس سے قبل خیبر پختونخوا کے صوبائی وزیر خزانہ تیمورسلیم جھگڑا نے میڈیا سے گفتگو کرتے ہوئے کہا تھا کہ ہم نے ایم او یو پر دستخط کا اختیار وزیراعلیٰ کو دے دیا، ہمارا اگلے سال خرچہ85ارب روپے ہو گا۔

انہوں نے کہا تھا کہ وفاق چاہتا ہے 60 ارب کا بوجھ ہم اٹھالیں، پی ایس پی کی مد میں5ارب روپے قبائلی اضلاع کیلئے مختص تھے، آئی ایم ایف سے معاہدہ ضروری ہے تو آئیں بات کریں۔

 تیمورسلیم جھگڑا نے کہا تھا کہ قبائلی اضلاع کے 60 لاکھ افراد کا صحت کارڈ ختم کرنے کو کہا گیا، آئی ایم ایف پرسیاست نہیں کرنی چاہیے یہ پاکستان کیلئے ضروری ہے۔

 خیبر پختونخوا کے صوبائی وزیر خزانہ نے کہا تھا کہ ہم اپنے صوبے کا حق محفوظ بنانا چاہتے ہیں، وفاق نے قبائلی اضلاع سے صحت کارڈ کی سہولت واپس لے لی، آئی ایم ایف سے درست بنیادوں پرمعاہدہ ضروری ہے۔

انہوں نے کہا تھا کہ اگر یہ25ارب اپنے پاس سے لگاتے ہیں تو ہمیں 25 ارب کا خسارہ ہو گا، قبائلی اضلاع کے فنڈ سے متعلق61ارب پر وفاقی حکومت سے وضاحت چاہتے ہیں۔