گوگل سرچ انجن کی مقبولیت کو ٹک ٹاک سے خطرہ لاحق ہے۔

گوگل کے اندرونی ڈیٹا کے مطابق 25 سال کی عمر کے لگ بھگ 40 فیصد افراد گوگل سرچ اور میپس کے مقابلے میں سرچنگ کے لیے ٹک ٹاک اور انسٹاگرام کو ترجیح دیتے ہیں۔

گزشتہ چند سالوں کے دوران ٹک ٹاک کے صارفین کی تعداد میں بہت تیزی سے اضافہ ہوا ہے۔

اس وقت ٹک ٹاک نے اپنی حریف ایپس انسٹاگرام اور اسنیپ چیٹ کو بھی مختصر ویڈیو کے فیچر کاپی کرنے پر مجبور کردیا ہے۔

گوگل کے ایک عہدیدار نے تصدیق کی ہے کہ ٹک ٹاک نے نوجوان افراد میں انٹرنیٹ سرچز کا رجحان بھی بدلنا شروع کردیا ہے۔

گوگل کے سنیئر نائب صدر پربھارکر راگھون نے ایک کانفرنس میں بتایا تھا کہ گوگل کے اندرونی ڈیٹا کے مطابق 40 فیصد کے لگ بھگ نوجوان اگر کوئی چیز یا جگہ تلاش کررہے ہوتے ہیں تو وہ ٹک ٹاک یا انسٹاگرام کا رخ کرتے ہیں۔

اس صورتحال سے نمٹنے کے لیے گوگل نے منصوبہ بندی بھی کی ہے اور سرچ انجن میں ایسی تبدیلیوں پر غور کیا جارہا ہے جو نوجوانوں کی توجہ کھینچ سکے۔

گوگل کے عہدیداران کے مطابق اس وقت ہمیں مختلف ذرائع سے مسابقت کا سامنا ہے جن میں جنرل اور اسپیشلائزڈ سرچ انجنز کے ساتھ ساتھ ایپس بھی شامل ہیں۔

اس سے قبل ایک رپورٹ میں بتایا گیا تھا کہ ٹک ٹاک پلیٹ فارم یوٹیوب کے لیے بھی خطرہ بنتا جارہا ہے۔

ایک اندازے کے مطابق 2024 تک ٹک ٹاک اشتہاری آمدنی کے معاملے میں یوٹیوب کو پیچھے چھوڑ دے گا۔