وزیرخارجہ بلاول بھٹو کا کہنا ہے کہ عالمی برادری افغانستان میں درپیش مسائل پر توجہ دے۔

پاکستان پیپلز پارٹی کے چیئرمین بلاول بھٹو زرداری نے نور خان ایئر بیس پر تقریب سے خطاب کرتے ہوئے کہا کہ افغانستان میں سیلاب سے متاثرہ لوگوں کے غم کے برابر میں شریک ہیں۔

انہوں نے کہا کہ افغانستان میں تباہ کن زلزلے سے جانی و مالی نقصان ہوا، پاکستان نے افغانستان کے لیے انسانی ہمدردی کے تحت امدادی سامان بھجوایا۔

بلاول بھٹو نے کہا کہ افغانستان پہلے بھی معاشی، انسانی بحران اور دیگر مسائل سے دوچار ہے، عالمی برادری افغانستان میں درپیش مسائل  پر توجہ دے۔

وزیرخارجہ نے مزید کہا کہ پاکستان خوشحال، پرامن اور مستحکم افغانستان کا خواہاں ہے، افغانستان میں شہریوں کی امداد کے لیے ہر ممکن تعاون جاری رکھیں گے۔

اقوام متحدہ نے کہا ہے کہ افغانستان میں طالبان کے حکومت میں آنے کے بعد سے سکیورٹی کی صورتحال میں بہتری آئی ہے لیکن انسانی حقوق کی صورتحال بری ہوئی ہے اور اس دوران سینکڑوں افراد ہلاک ہوئے ہیں۔

امریکی خبر رساں ادارے ایسوسی ایٹڈ پریس کے مطابق اقوام متحدہ کے افغانستان میں امدادی مشن (یوناما) نے گزشتہ روز شائع ہونے والی رپورٹ میں افغان خواتین اور بچیوں کو درپیش مشکل حالات کو بھی اجاگر کیا۔

رپورٹ میں یہ بھی بتایا کہ طالبان کے اقتدار میں آنے کے بعد کس طرح سے خواتین اور بچیوں کو ان کے بنیادی حقوق سے محروم کیا گیا۔

افغانستان کے لیے اقوام متحدہ کے نمائندہ خصوصی مارکس پوٹزیل نے کہا کہ نگرانی سے ظاہر ہوتا ہے کہ 15 اگست 2021ء کے بعد سے اگرچہ سکیورٹی کی صورتحال میں بہتری آئی ہے لیکن افغانستان کے عوام بالخصوص خواتین اور بچیوں کو ان کے مکمل حقوق نہیں دیئے گئے۔