پاک فوج کی مختلف اضلاع میں سیلاب سے متاثرہ علاقوں میں امدادی اور بحالی کی سرگرمیاں جاری ہیں۔

پاک فوج کے شعبہ تعلقات عامہ (آئی ایس پی آر) کے مطابق سیلاب سے متاثرہ علاقوں میں پاک فوج کی امدادی سرگرمیاں جاری ہیں، متاثرہ علاقوں سے ڈی واٹرنگ اور متاثرین کی محفوظ مقامات پر منتقلی کی جارہی ہے۔

آئی ایس پی آر نے بتایا کہ متاثرین کو طبی امداد اور خوراک بھی فراہم کی گئی ہے جبکہ مختلف مقامات پر میڈیکل کیمپ بھی قائم کردیئے گئے۔

آئی ایس پی آر کا کہنا تھا کہ بولان، لسبیلہ، اوتھل اور جھل مگسی اور غذر میں سیلاب کے دوران پھنسے 700 سے زائد خاندانوں کو محفوظ مقامات پر منتقل کر دیا گیا۔

آئی ایس پی آر نے بتایا کہ پاک فوج کے اہلکار طبی امداد فراہم کرنے اور مواصلاتی انفراسٹرکچر کی بحالی میں مصروف عمل ہیں۔

 دریاؤں کی صورتحال

آئی ایس پی آر نے بتایا کہ اٹک، تربیلا، چشمہ، گڈو کے مقام پر نچلے سیلاب سے سندھ کے علاوہ تمام دریا معمول کے مطابق بہہ رہے ہیں۔

ورسک کے مقام پر نچلا سیلاب اور دریائے کابل میں نوشہرہ کے مقام پر درمیانے درجے کا سیلاب ہے۔

خیبرپختونخوا

مردان میں سب سے زیادہ 133 ملی میٹر اور مہمند میں 85 ملی میٹر بارش ریکارڈ کی گئی جبکہ ضلع مہمند کے مقامی نالوں میں سیلاب کی اطلاع ہے۔

 جنوبی پنجاب

مٹھاون، کاہا اور سانگھڑ ہل میں تمام پہاڑی نالے معمول کے مطابق بہہ رہے ہیں جبکہ مقامی کمانڈروں نے راجن پور اور ڈی جی خان کا دورہ کیا اور سیلاب متاثرین میں امدادی اشیاء تقسیم کی گئیں۔

دونوں اضلاع میں میڈیکل کیمپ لگائے گئے ہیں۔

بلوچستان کے علاقے جھل مگسی کی صورتحال

گندھاوا کا مکمل رابطہ بحال کر دیا گیا ہے، گندھاوا اور گردونواح میں امدادی سرگرمیاں جاری ہیں۔

آرمی میڈیکل کیمپ میں 115 مریضوں کا علاج کیا گیا جبکہ خضدار۔ M-8 اب بھی منقطع ہے، رابطے کی بحالی پر کام جاری ہے۔

حافظ آباد میں سی ایم ایچ خضدار اور ایف سی کے فیلڈ میڈیکل کیمپ میں 145 متاثرہ افراد کا علاج کیا گیا۔

نصیرآباد

باباکوٹ اور گندھا کی متاثرہ آبادی کے لیے امدادی سرگرمیاں جاری ہیں، سیلاب متاثرین میں راشن اور پکا ہوا کھانا تقسیم کیا گیا۔

اس کے علاوہ گندکھا میں فیلڈ میڈیکل کیمپ میں مختلف مریضوں کا علاج بھی کیا گیا۔

نوشکی

پھنسے ہوئے لوگوں کے لیے امدادی سرگرمیاں جاری ہیں، پکا ہوا کھانا 1000 سے زیادہ لوگوں کو پیش کیا گیا جبکہ 3 مقامات پر تباہ ہونے والے N-40 کی مرمت کر کے ٹریفک بحال کر دی گئی۔

گلگت بلتستان

کے کے ایچ میں سکندر آباد کے قریب 2 مٹی کے تودے گرنے کی اطلاع ہے، ایف ڈبلیو او کی جانب سے سڑک کو یک طرفہ ٹریفک کے لیے کھول دیا گیا ہے۔