صوبائی وزیر شرجیل انعام میمن کا کہنا ہے کہ  انصاف کے تقاضے سب کیلئے یکساں ہونے چاہئیں۔

وزیر اطلاعات سندھ شرجیل انعام میمن نے اپنے جاری کردہ بیان میں کہا کہ پی ٹی آئی نے ملک کی عدالتوں پر اثر انداز ہونے کی ہر ممکن کوشش کی ہے۔

انہوں نے کہا کہ سپریم کورٹ لاہور رجسٹری پر حملہ ملک کی عدلیہ پر حملہ تصور کرتے ہیں، عمران خان ملک میں بدمعاشی اور غنڈہ گردی کر کے اداروں پر اثر انداز ہورہے ہیں۔

شرجیل میمن نے کہا کہ پچھلے 5 سالوں سے عمران خان اپنی مرضی کے فیصلے لیتے رہے ہیں، افسوس کی بات ہے کہ عمران خان کو جھوٹا صادق و امین کا سرٹیفیکیٹ ملا ہوا ہے اور کے پی کے بی آر ٹی پر بھی اسٹے آرڈر ملا ہوا ہے۔

انکا کہنا ہے کہ عمران خان کو بنی گالا کی غیر قانونی تعمیرات پر بھی اجازت دی گئی، ملک سے لاڈلہ ازم کا خاتمہ ہونا چاہیے، قانون سب کے لیے یکساں ہونا چاہیے، اگر یہی روایت رہی کہ جس کی لاٹھی اس کی بھینس تو کیا میسج نہیں دیا جارہا کہ ہر کوئی لاٹھی اٹھا لے۔

صوبائی وزیر نے کہا کہ انصاف کے تقاضے سب کے لیے یکساں ہونے چاہئیں، پاکستان میں عمران خان کے لیے الگ قانون ہے اور باقی لوگوں کے لیے الگ قانون ہے، عمران خان خود کو قانون سے بالاتر سمجھتے ہیں۔

شرجیل میمن نے مزید کہا کہ عمران خان اور پی ٹی آئی کو سو خون معاف ہیں، پاکستان پیپلز پارٹی اور اس کے اتحادی ملک سے لاڈلہ ازم کے خاتمہ اور قانون کی بالادستی کے لئے جدوجہد کررہے ہیں۔