اتحادی حکومت ملک میں مہنگائی کو کنٹرول کرنے میں مسلسل ناکام ہے، ادارہ شماریات کی جانب سے مہنگائی کی ہفتہ وار رپورٹ جاری کردی گئی ہے۔

تفصیلات کے مطابق ادارہ شماریات کی جانب سے جاری ہونے والی رپورٹ کے مطابق ہفتہ وار بنیادوں پر مہنگائی میں مزید 1 عشاریہ 32 فیصد اضافہ ہوگیا ہے، ملک میں مہنگائی کی مجموعی شرح 33 عشاریہ 66 فیصد تک پہنچ گئی ہے۔

ادارہ شماریات کے مطابق ایک ہفتے میں تیس اشیائے ضروریہ کی قیمتوں میں اضافہ ہوا جبکہ حالیہ ہفتے پانچ اشیا سستی،سولہ اشیا کی قیمتوں میں استحکام رہا۔

ادارہ شماریات کی رپورٹ میں کہا گیا ہے کہ حالیہ ہفتے پیٹرول چھ عشاریہ 36 فیصد اور ڈیزل پانچ عشاریہ 06 فیصد مہنگا ہوا جبکہ ایل پی جی 2 عشاریہ 33 فیصد مہنگا ہوا۔

رپورٹ میں یہ بھی کہا گیا ہےکہ ایک ہفتے میں گھی کا اڑھائی کلو کا ڈبہ ایک عشاریہ 64 فیصد اور آلو دو عشاریہ 57 فیصد مہنگا ہوا جبکہ لہسن کی قیمت میں پانچ عشاریہ 06 فیصد اضافہ ہوا ہے۔

ادارہ شماریات کی جانب سے جاری ہونے والی رپورٹ میں مزید کہا گیا ہے کہ حالیہ ہفتے آٹا، دال چنا، دال مسور، انڈے، دہی چاول، چینی،دودھ کی قیمتوں میں بھی اضافہ ہوا جبکہ حالیہ ہفتے ٹماٹر، پیاز،دال ماش اور کیلے سستے ہوئے۔