گورنر پنجاب محمد بلیغ الرحمان نے کہا ہے کہ نوجوانوں کو بہتر تعلیم دینا حکومت اور اساتذہ کی مشترکہ ذمہ داری ہے۔

محمد بلیغ الرحمان سے اسلامیہ یونیورسٹی کے طلباء کے وفد کی ملاقات ہوئی جس میں وفد کی قیادت اسلامیہ یونیورسٹی بہاولپور کے میڈیا اینڈ کمیونیکیشن اسٹیڈیز ڈیپارٹمنٹ کے ہیڈ آف ڈیپارٹمنٹ عبدالواجد خان نے کی۔

گورنر پنجاب نے ملاقات میں گفتگو کرتے ہوئے کہا کہ اعلیٰ تعلیم کا فروغ مسلم لیگ ن کی حکومت کی ہمیشہ سے ترجیح رہی ہے۔

انہوں نے کہا کہ نوجوان ہمارا سرمایہ ہیں، نوجوانوں کو بہتر تعلیم دینا اور تربیت کرنا حکومت، اساتذہ اور معاشرے کی مشترکہ ذمہ داری ہے۔

انکا کہنا ہے کہ سیدھے راستے اور سچائی میں دائمی کامیابی ہے، ہمیشہ مثبت اور معاشرے کی بہتری کا سوچیں، مسلم لیگ ن کے سابق ادوار میں بہاولپور سمیت جنوپی پنجاب کی ترقی پہ خصوصی توجہ دی گئی۔

بلیغ الرحمان نے کہا کہ بہاولپور میں چولستان یونیورسٹی آف ویٹرنری اینڈ اینیمل سائنسز، علامہ اقبال اوپن ہونیورسٹی کا کیپس، ہوم اکنامکس کالج انڈسٹریل اسٹیٹ سمیت مختلف ترقیاتی منصوبے شروع کیے گئے۔

گورنر پنجاب نے کہا کہ اسلامیہ ہونیورسٹی بہاولپور کی ترقی اور ترویج کرنے کے لیے خطیر فنڈز دیئے گئے، ان فنڈز سے اسلامیہ یونیورسٹی بہاولپور میں نئی لیبز، طلباء کے ہوسٹلز اور نئے بلاکس بنائے گئے لیکن سابق حکومت نے یہ ترقیاتی منصوبے نظر انداز کیے۔

انہوں نے مزید کہا کہ دوبارہ ذمہ داری ملی ہے تو بہت سے معاشی مسائل کا سامنا ہے، اسلامیہ یونیورسٹی بہاولپور کی مزید بہتری کے لیے اقدامات اٹھائیں گے، تعلیم اور صحت کے  شعبے کی ترقی حکومت کی ترجیحات میں ہے۔

واضح رہے کہ وفد میں یونیورسٹی کے فیکلٹی ممبرز ڈاکٹر راو شاہد اور ڈاکٹر عائشہ الیاس بھی شامل تھیں۔