پاکستان تحریک انصاف (پی ٹی آئی) کی رہنما ڈاکٹر یاسمین راشد نے کہا ہے کہ سانحہ ماڈل ٹاؤن کے واقعے پر رانا ثناءاللہ کیخلاف مقدمہ ضرور درج کروائیں گے۔

انسداد دہشتگردی عدالت کے باہر ڈاکٹر یاسمین راشد نے میڈیا سے گفتگو کرتے ہوئے کہا کہ ہمارے اوپر جھوٹے مقدمات درج کروائے۔

انہوں نے مزید کہا کہ اس حکومت نے ماضی میں بھی یہی کیا اور اب بھی وہی کیا، ماضی میں سانحہ ماڈل ٹاؤن کا واقعہ ہوا، رانا ثناء اللہ کے خلاف مقدمہ ضرور درج کروائیں گے۔

دوسری جانب جمیشد اقبال چیمہ نے انسداد دہشتگردی عدالت کے باہر میڈیا سے گفتگو کرتے ہوئے کہا کہ کوئی شک نہیں ہے کہ مسلم لیگ ن کی حکومت نے عوام کیساتھ دہشتگردی کی ہے۔

انہوں نے کہا کہ وہ معاشی دہشتگردی ہو یا دوسری دہشتگردی ہو، وہ عوام پر آنسو گیس پھینکے والی دہشتگردی ہو یا مقدمے درج کرنے والی ہو، وہ دہشتگردی لوگوں کو گرفتار کرنے والی ہو، چادر اور چار دیواری کا تقدس پامال کرنے والی دہشتگردی ہو، اس دہشتگردی کا نتیجہ عوام نے دے دیا ہے۔

جمیشد اقبال چیمہ نے کہا کہ 17 جولائی کو مسلم لیگ ن بری طرح ہار گئی، پی ٹی آئی کا 3 ماہ میں ووٹر دگنا ہو گیا ہے، ہماری بے گناہی کا ثبوت یہی ہے، مسلم لیگ ن نے آج بھی سبق نہیں سیکھا۔

انہوں نے مزید کہا کہ رانا ثناءاللہ آج کہتے ہیں کہ 5 ووٹ ادھر ادھر ہو گئے تو پرویز الٰہی کہاں سے حکومت تلاش کرے گا، ان کا وزیر داخلہ باقاعدہ دہشتگردوں والی زبان بولتا ہے، دھمکیاں دیتا ہے، وزیر داخلہ عوام پر دہشتگردی کرنے کو تیار ہے، ہمارے کیخلاف جتنے بھی مقدمات درج کئے گئے وہ تمام غلط ہیں۔