الیکشن کمیشن آف پاکستان نے کل پنجاب اسمبلی کے 20 حلقوں میں ہونے والے ضمنی انتخابات کی نگرانی کے لیے مرکزی اور صوبائی سطح پر خصوصی کنٹرول رومز قائم کر دیے ہیں۔

الیکشن کمیشن کے مطابق پولنگ کے نتائج مرتب ہونے تک کنٹرول رومز کام کرتے رہیں گے۔

کسی بھی ہنگامی صورتحال سے نمٹنے کے لیے ریٹرننگ افسران، متعلقہ ڈپٹی کمشنرز، پولیس، رینجرز اور پاک فوج کے نمائندے کنٹرول رومز میں موجود ہوں گے۔

کنٹرول رومز الیکشن سے متعلق شکایات کا فوری ازالہ کریں گے۔

الیکشن کمیشن نے بتایا ہے کہ آج 20 صوبائی اسمبلی کے حلقوں میں پولنگ کے سامانِ کی ترسیل کی جائے گی۔

دوسری جانب الیکشن کمیشن آف پاکستان نے پولنگ ایجنٹس کیلئے ضابطہ اخلاق جاری کر دیا ہے۔

 جاری کردہ ضابطہ اخلاق میں کہا گیا کہ پولنگ ایجنٹ کے پاس اختیار نامہ اور اصلی قومی شناختی کارڈ موجود ہونا لازمی ہے۔

ادارے کا کہنا ہے کہ کسی دوسرے پولنگ اسٹیشن پر ووٹ ڈالنے والے ووٹر پر پولنگ ایجنٹ اعتراض کر سکتا ہے۔

الیکشن کمیشن نے 20 حلقوں میں 676 پولنگ اسٹیشنز کو انتہائی حساس قراردے دیا ہے۔

ذرائع کے مطابق 1194 پولنگ اسٹیشنز حساس قرار، 1271 پولنگ اسٹیشنز کو حساسیت کے اعتبار سے نارمل قرار دیا گیا ہے۔

اسکے علاوہ لاہورکے 4 صوبائی حلقوں میں 122 پولنگ اسٹیشنز انتہائی حساس قراردئیے گئے ہیں جبکہ 343 پولنگ اسٹیشنز کو حساس قراردیا گیا ہے۔