سی ٹی ڈی کراچی نے جامعہ کراچی میں چینی شہریوں پر خودکش حملے میں ملوث گرفتار ملزم داد بخش کیخلاف ایک اورمقدمہ درج کرلیا۔ 

تفتیشی افسرنےانسداد دہشتگردی کی عدالت کو بتایا کہ ملزم کی نشاندہی پرگلشن اقبال کچی آبادی سے دستی بم اوربارودی مواد برآمد کیے ہیں۔

تفتیشی افسر فیاض قادری نے بتایا کہ ملزم کے خلاف بارودی مواد برآمدگی کا مقدمہ درج کیا ہے۔ ملزم داد بخش نے جامعہ کراچی خودکش حملے کے لیے ریکی کی تھی۔

عدالت نے ملزم داد بخش کو نئے مقدمے میں تین روزہ جسمانی ریمانڈ پرسی ٹی ڈی کے حوالے کردیا۔

ملزم داد بخش کی شناخت پریڈ

جامعہ کراچی میں چینی شہریوں پر خود کش حملہ میں ملوث ملزم داد بخش کو بعد ازاں سٹی کورٹ میں جوڈیشل مجسٹریٹ شرقی کے روبروشناختی پریڈ کے لیے پیش کیا گیا۔

حملے میں زخمی واقعے کے عینی شاہد نے ملزم کو شناخت کرلیا۔

شناخت پریڈ میں ملزم کے ہمراہ دس ڈمی ملزمان بھی پیش کیے گئے تھے۔

عینی شاہد کا کہنا تھا کہ ملزم حملے سے قبل جامعہ کراچی آیا تھا جبکہ تفتیشی افسر نے عدالت کو بتایا کہ ملزم نے خودکش حملے سے قبل جامعہ کراچی میں چینی اساتذہ کو لانے والی وین کی ریکی کی۔

شناخت پریڈ کے موقع پرسٹی کورٹ میں سیکیورٹی کے غیر معمولی انتظامات کیے گئے تھے۔

ہیڈ کانسٹبل لاپتا

دوسری جانب سندھ پولیس کے ہیڈ کانسٹبل جاوید چوہان کی گمشدگی کے بعد اہلخانہ نے سندھ ہائی کورٹ سے رجوع کرلیا۔

عدالت نے محکمہ داخلہ اوردیگر سے رپورٹ طلب کرتے ہوئے حکم دیا کہ 19 جولائی کو جواب پیش کیا جائے۔

اہل خانہ کی جانب سے دائر درخواست میں مؤقف پیش کیا گیا تھا کہ ہیڈ کانسٹبل جاوید کو چوہان کو سندھ ہائی کورٹ کے باہر سے حراست میں لیا گیا۔ 23 جون سے ہیڈ کانسٹبل لاپتا ہے بازیاب کرایا جائے۔