پاکستان کے معروف میزبان اور اداکار ساحر لودھی نے بالی وڈ کے کنگ خان کے ساتھ کی جانے والی ملاقات کےحوالے سے اہم انکشاف کر دیا۔

فلم ’اے دل ہے مشکل‘ کی پروموشن کے لیے شاہ رخ خان اور کاجول کے ساتھ ساحر لودھی کی بات چیت ہوئی جس کی تصاویر انہوں نے انسٹاگرام پر بھی شیئر کی تھیں۔

ساحر لودھی نے اپنی اور شاہ رخ خان کی پہلی ملاقات کے بارے میں بتایا کہ اداکار کی ٹیم اُنہیں دیکھ کر حیران رہ گئی تھی۔

یاد رہے کہ ساحر لودھی شاہ رخ خان کے ساتھ مشابہت کی وجہ سے مشہور ہیں۔

تاہم کچھ لوگوں کا اداکار ساحر پر الزام ہےکہ وہ شاہ رخ خان کی نقل کرتے ہیں۔

اس حوالےسے ساحر کا کہنا ہے کہ انہیں اس بات کا کوئی علم نہیں کہ عوام انہیں شاہ رخ کے ساتھ کیوں جوڑتے ہیں۔

حال ہی میں میزبان متھیرا کو دیے گئے انٹرویو میں ساحر لودھی نے شاہ رخ خان کے ساتھ اپنی پہلی ملاقات کے بارے میں بتایا۔

ساحر لودھی نے کہا کہ ہر اینکر پرسن کو شاہ رخ خان کے مختصر انٹرویو کے لیے بیس منٹ کا وقت دیا گیا اور میں بھی اُن کا انٹرویو لینے کے لیے وہاں موجود تھا۔

اُنہوں نے بتایا کہ جب شاہ رخ خان کی ٹیم نے مجھے دیکھا تو اُن کی ٹیم کی ایک لڑکی نے مجھے کہا کہ تم میرے باس لگتے ہو جس پر میں نے کہا کہ واقعی؟

بعدازاں کاجول اندر داخل ہوئیں اور وہ بھی مجھے دیکھ کر حیران ہوگئیں۔

تاہم جب اداکار شاہ رخ خان کمرے میں پہنچے، ہم دونوں نے ایک دوسرے کی طرف دیکھا، انہوں نے مسکراتے ہوئے کہا کہ ’آپ بہت ہینڈسم ہیں‘۔

شاہ رخ خان کے بارے ساحر نے کہا کہ وہ ایک حیرت انگیز شخص ہے، یہ بہت اچھا انٹرویو تھا، وہ پُرجوش شخص ہے، اداکار کے پاس پیش کرنے کے لیے بہت کچھ ہے، وہ پیارا اور آپ کے خیال سے کہیں زیادہ گہرا ہے۔

واضح رہے کہ ساحر لودھی ایک کامیاب میزبان کے طور پر مقبول ہیں مگر اداکاری اور ہدایت کاری کا کام بھی بخوبی انجام دیا ہے۔