وزیر اعلیٰ بلوچستان میر عبدالقدوس بزنجو نے کہا ہے کہ تجاویزات قائم کرنے والوں کے خلاف قانونی کارروائی کی جائے۔

وزیر اعلیٰ بلوچستان میر عبدالقدوس بزنجو نے اپنے بیان میں کہا ہے کہ تجاویزات قائم کرنے والوں کے خلاف قانونی کارروائی کی جائے، محکمہ آبپاشی تجاویزات کے خاتمے کے لیے بھاری مشنری اور ڈی سی کوئٹہ فورس فراہم کریں۔

انہوں نے کہا کہ کارروائی سے چیف سیکریٹری اور وزیر اعلیٰ سیکریٹریٹ کو آگاہ رکھا جائے۔

   وزیر اعلیٰ بلوچستان نے محکمہ آبپاشی اور ضلعی انتظامیہ کوبند نالوں کی فوری صفائی کے آپریشن کے آغاز کی ہدایت دی۔

میر عبدالقدوس بزنجو نے کہا کہ محکمہ خزانہ نالوں کی صفائی کے لیے مطلوبہ فنڈز کا فوری اجراء کریں، آئندہ بارش سے پہلے نالوں کی صفائی اور تجاویزات کو ہر صورت ختم کیا جائے۔

انہوں نے کہا کہ تجاویزات کے ذمہ داروں کی وجہ سے عام شہریوں کی جان و مال کو خطرے میں نہیں ڈالنے دیا جائے گا۔

 وزیر اعلیٰ بلوچستان نے کہا کہ متعلقہ محکمے اور ادارے اپنی اتھارٹی قائم رکھیں تو کسی کو تجاویزات قائم کرنے کی ہمت نہ ہو، قانون کی بالادستی اور عملداری کو ہر صورت برقرار رکھا جائے۔

انہوں نے کہا کہ کوئٹہ سمیت صوبے کے دیگر علاقوں میں آئندہ بارش سے پہلے احتیاطی تدابیر پر عملدرآمد یقینی بنایا جائے، متعلقہ اضلاع کی انتظامیہ سروے کرکے نقصانات کا تخمینہ لگائے۔

     میر عبدالقدوس بزنجو نے کہا کہ سروے کی روشنی میں متاثرین کے نقصانات کا ازالہ کیا جائے گا۔