آئی جی سندھ کی جانب سے مون سون بارشوں کے دوران ٹریفک پلان پر عمل درآمد کو یقینی بنانے کی ہدایات جاری کردی گئیں ہیں۔

مون سون بارشوں میں کسی بھی قسم کی صورتحال سے بچاؤ کے لئے آئی جی سندھ غلام نبی میمن نے رین ایمرجنسی پلان پر عمل کرنے کی ہدایت کردی ہے۔

آئی جی سندھ کا کہنا تھا کہ بارشوں کے باعث زیرآب آجانیوالی سڑکوں کے لئے متبادل روٹس اور انکی تشہیر، نشیبی علاقوں کی شاہراہوں، گلیوں اور محلوں سے پانی کی نکاسی کے لیئے تمام تراقدامات کیئے جائیں۔

متعلقہ اداروں سے روابط کے تحت بارشوں کے پانی سے سڑکوں پرخراب ہوجانیوالی گاڑیوں کو فوری ہٹا کر سڑکوں کو کلیئر کیا جائے اور متاثرہ شہریوں کی رہنمائی اورمعاونت کے عمل کو ممکن بنایا جائے۔

پلان کے مطابق تمام ایس ایس پیز ضلعی، ٹریفک متعلقہ ایس ایچ اوز اور سیکشن افسران کو علاقوں میں موجودگی کا پابند بنائیں اور ٹریفک سگنلز، چوراہوں، یوٹرنز، ٹریفک جنکشنز وغیرہ پر ٹریفک ہولیس افسران اور جوانوں کو تعینات کیا جائے۔

بارشوں کے باعث جن سڑکوں پرٹریفک دباؤ بڑھ رہا ہو انھیں باقاعدہ حکمت عملی کے تحت ناصرف کم کیا جائے بلکہ ٹریفک جام کے دوران ممکنہ جرائم کی روک تھام کو بھی یقینی بنایا جائے۔

آئی جی سندھ نے کہا کہ سندھ بھر کے تمام وائرلیس کنٹرول رومز، ٹریفک پولیس کنٹرول پر تمام علاقوں میں بارشوں کی صورتحال پر ٹریفک کی لمحہ بہ لمحہ رپورٹنگ کے عمل کو ممکن بنایا جائے۔