بلوچستان میں بارشوں کے باعث ہونے والی تباہی کے پیش نظر وزیراعظم نے متعلقہ حکام کو فوری ریلیف آپریشن شروع کرنے کی ہدایات جاری کردی ہیں۔

تفصیلات کے مطابق وفاقی وزیر ہاؤسنگ اینڈ ورکس مولانا عبدالواسع کا وزیراعظم شہباز شریف سے بلوچستان میں ہونے والے بارشوں سے تباہی کی صورت حال پر ٹیلی فونک رابطہ ہوا۔

اس موقع پر وزیراعظم شہباز شریف نے بلوچستان میں جاری بارشوں سے انسانی جانوں پر افسوس کا اظہار کرتے ہوئے وفاقی وزیر کو فوری طور متاثرہ علاقوں کے دورے کی ہدایت کی ہے۔

اسکے علاوہ وزیراعظم نے این ڈی ایم اے اور چیف سکریٹری بلوچستان کو فوری طور پر متاثرہ علاقوں میں ریلیف آپریشن شروع کرنے کی ہدایات جاری کردی ہیں۔

خیال رہے کہ بلوچستان میں گزشتہ 24 گھنٹوں کے دوران سیلابی ریلوں میں ڈوب کر مزید 16 افراد ہلاک ہو گئے ہیں جبکہ  گزشتہ تین دنوں کے دوران ہلاک ہونے والے افراد کی تعداد 48 ہو گئی ہے۔

 ڈپٹی کمشنر چمن حسن ہوت کا کہنا ہے کہ کلی ٹھیکیداراڈہ کہول، بوری کہول، روغانی روڈ پر سیلابی ریلوں میں بہنے اور دیواریں گرنے سے دو بچوں سمیت تین افراد جاں بحق ہوئے۔

قمر الدین کاریز میں دو افراد سیلابی ریلے میں ڈوب کر افراد جاں بحق ہوئے جبکہ خسنوب جلال زئی میں سیلاب میں بہہ کر خواتین اور بچوں سمیت چار افراد جاں بحق ہوئے۔

خسنوب جلال زئی میں سیلاب میں بہہ کر خواتین اور بچوں سمیت چار افراد جاں بحق جبکہ خسنوب جلال زئی میں دو افراد تاحال لاپتہ ہیں۔

پٹھان کوٹ میں سیلابی ریلے میں بہہ کر خاتون اور بچے سمیت 3 افراد جاں بحق جبکہ مند ردیگ ندی میں ڈوب کر تین بچے جاں بحق ہوئے۔

 دشت تیرا مل میں دو خانہ بدوش خواتین کپڑے دھوتے ہوئے بارش کے جمع شدہ پانی میں ڈوب کرجاں بحق ہوئی جبکہ  مچھ گیشتری نالے میں بہنے والے دو کانکنوں کی لاشیں نکال لی گئیں۔