وفاقی وزیر مریم اورنگزیب نے کہا ہے کہ  عمران صاحب خود کو قانون سمجھتے ہیں، وہ لاڈلا بننے کی کوشش میں قانون اور ضابطے کے سامنے سر جھکانے کو تیار نہیں ہیں۔

وزیراطلاعات مریم اورنگزیب نے کہا کہ عمران صاحب وزیراعظم ہوکر الیکشن کمیشن کے قانون، احکامات اور ضابطوں کی دھجیاں اڑاتے رہے، الیکشن کمشن کے واضح احکامات کی خلاف ورزی کرتے ہوئے گلگت بلتستان ، خیبرپختونخواہ اور آزادکشمیر کے انتخابات میں مہم چلائی تھی۔

انہوں نے کہا کہ ابھی ضمنی الیکشن ہوئے نہیں اور عمران صاحب کا ماتم شروع ہو گیا ہے، دھاندلی کے الزامات عمران خان کا اپنی شکست کا پیشگی اعتراف ہے۔

انہوں نے مزید کہا کہ عمران صاحب الیکشن کمیشن کو روز گالیاں اور دھمکیاں بھی دیتے ہیں اور درخواستیں بھی دے رہے ہیں۔

مریم اورنگزیب نے کہا کہ حکومت میں بھی الیکشن کمیشن کو دھمکیاں اورآج بھی الیکشن چور الیکشن کمیشن پہ ہر روز حملے کررہے ہیں۔

ان کا کہنا تھا کہ پاکستان مسلم لیگ (ن) کے وزراء نے قانون، انتخابی ضابطوں اور الیکشن کمیشن کے احکامات کے آگے سر جھکاتے ہوئے استعفے دئیے، اسکے علاوہ وزیراعظم شہبازشریف کو الیکشن کمشن نے حکم دیا تو انہوں نے دورہ منسوخ کردیا۔

انہوں نے بتایا کہ عمران صاحب آپ کے وزرا الیکشن مہم میں پیسے تقسیم کرتے، ترقیاتی سکیموں کا اعلان کرتے اور دھاندلی کرتے رنگے ہاتھوں پکڑے گئے تھے۔