ضمنی انتخابات میں ن لیگی امیدواروں کی شکست کا جائزہ لینے کے لئے اتحادی حکومت کے بڑوں کے درمیان رابطہ ہوا ہے۔

اس حوالے سے ذرائع کا کہنا ہے کہ نواز شریف، آصف زرداری اور مولانا فضل الرحمان کے درمیان ٹیلیفونک رابطہ ہوا ہے۔

رابطے میں تینوں رہنماؤں نے پنجاب کے ضمنی انتخابات میں ن لیگی امیدواروں کی شکست کا جائزہ لیا ہے جبکہ پنجاب اور مرکز میں آئندہ کی حکمت عملی پر بھی تبادلہ خیال کیا گیا ہے۔

ذرائع کا کہنا ہے کہ اس موقع پر تینوں رہنماؤں نے مؤقف اختیار کرتے ہوئے کہا کہ بڑھتی مہنگائی اور تیل کی قیمتوں میں اضافے کا بدلہ عوام نے لیا ہے۔

ذرائع نے بتایا کہ تینوں رہنماؤں کی جانب سے جلد عام  انتخابات کروانے سے متعلق تجاویز پر غور کیا گیا ہے تاہم اتحادیوں کی مشاورت سے تفصیلی لائحہ عمل اختیار کیا جائے گا۔

خیال رہے کہ پنجاب میں پی ٹی آئی اتحاد کو سادی اکثریت حاصل ہوگئی ہے اور یوں پنجاب کے وزارت اعلیٰ کی سیٹ اب تحریک انصاف کے امیدوار کی ہی ہوگی۔ پی ٹی آئی اتحاد نے 186 نشستیں حاصل کرلی ہیں۔ پنجاب میں پی ٹی آئی کی 176 اور مسلم لیک (ق) کی 10 نشستیں ہیں۔

دوسری جانب مسلم لیگ (ن) کو صرف 3 سیٹوں پر کامیابی ملی اور ایک سیٹ آزاد امیدوار کے حصے میں آئی۔