ایڈمنسٹریٹر کراچی مرتضیٰ وہاب نے کہا ہے کہ ہم سلیپر سیل کو پکڑنے میں کامیاب ہوئے ہیں۔

تفصیلات کے مطابق ایڈمنسٹریٹر کراچی مرتضیٰ وہاب نے اپنے بیان میں کہا ہے کہ جامعہ کراچی دھماکے میں خاتون تنہا نہیں تھی اس کے ساتھ ماسک پہنا ایک شخص مسلسل ساتھ تھا، چار افراد ایسے تھے جو ساتھ تھے، ہم نے سب کو شناخت کرلیا۔

انہوں نے کہا کہ تیسرا کردار گرفتار دہشتگرد داد بخش ہے چوتھا مفرور ماسٹر مائنڈ زیب ہے، پہلا اور دوسرا کردار خاتون اور اس کا شوہر تھے، جولائی دو ہزار اکیس میں بھی چائینیز پر حملے کا واقعہ ہوا تھا۔

    مرتضیٰ وہاب نے کہا ہے کہ ہم سلیپر سیل کو پکڑنے میں کامیاب ہوئے ہیں، ہمارے ادارے مبارکباد کے مستحق ہیں۔

دوسری جانب صوبائی وزیر اطلاعات سندھ شرجیل انعام میمن نے پریس کانفرنس کرتے ہوئے کہا کہ جامعہ کراچی دھماکے میں خاتون کے ساتھ ایک اور شخص موجود تھا، شوہراور ٹرینر نے شاری بلوچ کی نفسیاتی کیفیت کا فائدہ اٹھایا، دہشتگرد نے بتایا کہ جامعہ کراچی میں دھماکا 2 کالعدم جماعتوں کا تھا، شاری بلوچ کا کیس نفسیاتی ٹیم بھی دیکھ رہی ہے۔

انہوں نے کہا کہ سی پیک جیسے اہم منصوبے چین کی مدد سے چل رہے ہیں، دہشگرد تنظیمیں ملک میں عدم استحکام پیدا کرنا چاہتی ہیں، ملزم نے چینی انجینئرز کی گاڑی پر فائرنگ کا بھی اعتراف کیا۔

شرجیل انعام میمن نے کہا کہ دہشتگردوں کا نیٹ ورک دیگرممالک میں بھی پھیلا ہوا ہے، سی ٹی ڈی نے کارروائی میں کالعدم بی ایل ایف کمانڈر کو گرفتار کیا، کالعدم بی ایل ایف کمانڈر کو ہاکس بے سے4 جولائی کو گرفتار کیا گیا۔

صوبائی وزیر اطلاعات سندھ نے کہا کہ کالعدم بی ایل اے نے ذمہ داری قبول کی تھی، گرفتار دہشتگرد سلیپر سیل کا کمانڈر ہے، جامعہ کراچی خودکش حملے کے لیے خاتون کواستعمال کیا گیا، تمام اداروں نے مل کرتفتیش کی۔

انہوں نے کہا کہ دہشتگرد نے انکشاف کیا ماسٹرمائنڈ زیب ہے جسکا تعلق پڑوسی ملک کی ایجنسی سے ہے، دہشت گرد خود بھی آئی ای ڈی بنانے کا ماہر ہے،  سی سی ٹی وی جیو فینسنگ کی مدد سے ایک ملزم کو گرفتار کیا۔

  شرجیل میمن نے کہا کہ واقعے کے بعد صوبائی اور وفاقی حکومت مکمل الرٹ تھی، ملزم نے دوران تفتیش اہم انکشافات کیے، دہشتگرد نے یہ بھی بتایا ہماری اہم تنصیبات دہشتگردوں کے نشانے پرتھی۔

  صوبائی وزیر اطلاعات سندھ نے کہا کہ عدم تحفظ کا شکارخواتین کو بھی ٹارگٹ کرکے مقصد کیلئے استعمال کیا جا رہا ہے، شاری بلوچ کو بھی نفسیاتی طور پردباؤ میں لے کر اسکے شوہر کے ذریعے استعمال کیا گیا۔