وفاقی وزیر قانون و انصاف نے اہل وطن اور امت مسلمہ کو عیدالاضحیٰ کی مبارکباد پیش کی ہے۔

اپنے ایک بیان میں وفاقی وزیر قانون و انصاف اعظم نذیر تارڑ نے تمام اہل وطن اور امت مسلمہ کو عیدالاضحٰی کی مبارکباد دیتے ہوئے کہا کہ ضرورت اس امر کی ہے کہ ہم قربانی جیسی عظیم عبادت کی حقیقی روح کو سمجھیں۔

اپنے پیغام میں وفاقی وزیر قانون و انصاف اعظم نذیر تارڑ نے مزید کہا کہ دعا گو ہوں کہ اللہ تعالیٰ ہماری قربانیاں قبول فرمائے، عید کے اس پر مسرت موقع پر اپنے اردگرد موجود ضرورت مندوں کا خصوصی خیال رکھیں۔

واضح رہے کہ ملک بھر میں حضرت ابراہیمؑ کی عظیم قربانی کی یاد میں عیدالاضحیٰ آج مذہبی عقیدت واحترام کے ساتھ منائی جارہی ہے۔

کراچی، اسلام آباد، پشاور اور کوئٹہ سمیت ملک کے تمام چھوٹے بڑے شہروں، قصبوں اور دیہات کی مساجد، عیدگاہوں اورکھلے مقامات پر نماز عید کے اجتماعات ہوئے جس میں علمائے کرام فلسفہ قربانی کی اہمیت کو اجاگر کیا۔

نماز عید کی ادائیگی کے بعد امت مسلمہ کی یکجہتی، وطن کی سلامتی، ترقی، خوشحالی اور کورونا وباء کے خاتمے کے لئے خصوصی دعائیں بھی مانگی گئیں۔

نماز عیدالاضحیٰ کی ادائیگی کے بعد سنت ابراہیمی کی پیروی کرتے ہوئے اللہ کی راہ میں جانوروں کی قربانی کی گئی۔

عید الاضحٰی کے موقع پر ملک بھر میں سیکیورٹی کے خصوصی انتظامات کیے گئے ہیں، جس کے تحت مساجد اور عید گاہوں کے باہر پولیس کی بھاری نفری تعینات کردی گئی ہے۔