امریکہ اور چین کے درمیان ٹرمپ دور سے جاری تناؤ میں کمی واقع ہو رہی ہے اور دونوں ممالک نے سفارتی تعلقات بحال رکھنے کا عزم کیا ہے۔

غیر ملکی خبر رساں ادارے کے مطابق انڈونیشیا میں جی ٹوئنٹی ممالک کا اجلاس رواں برس نومبر میں ہوگا۔ اس سے قبل ان ممالک کے وزرائے خارجہ کا اجلاس آج ہوا جس میں امریکہ اور چین کے وزرائے خارجہ نے ملاقات کی۔

ملاقات کے حوالے سے امریکی وزیر خارجہ انٹونی بلنکن کا کہنا تھا کہ چینی ہم منصب کے ساتھ  مفید، واضح اور تعمیری بات چیت رہی۔ امریکہ اور چین کے تعلقات نہ صرف فریقین کے لیے بلکہ پوری دنیا کے لیے سود مند ثابت ہوں گے۔

امریکی وزیر خارجہ نے چین کے ساتھ تعلقات اور مسابقت میں انتہائی ذمہ داری کا مظاہرہ کرنے کے عزم کا اظہار کرتے ہوئے کہا کہ چین کے ساتھ سفارتی تعلقات کی بحالی کے راستے کھلے رکھیں گے۔

چین کے وزارت خارجہ کی جانب سے جاری کردہ بیان میں کہا گیا ہے کہ امریکی وزیر خارجہ سے ٹھوس اور تعمیری ملاقات رہی۔ ایسی ملاقاتوں سے افہام و تفہیم بڑھانے اور غلط فہمیاں دور کرنے میں مدد ملے گی۔

چینی وزارت خارجہ کی جانب سے جاری بیان میں یہ بھی کہا گیا ہے کہ امریکہ ایک بڑا ملک ہے اس لیے ذمہ داری بھی امریکہ کی زیادہ بنتی ہے۔ مشترکہ مفادات کے تحفظ کے لیے تعمیری ملاقاتوں کا سلسلہ جاری رہنا چاہیئے۔