ترجمان حکومت بلوچستان فرح عظیم شاہ نے کہا ہے کہ وزیراعظم نے بلوچستان سے تعاون کی یقین دہانی کرائی ہے۔

تفصیلات کے مطابق ترجمان حکومت بلوچستان فرح عظیم شاہ نے اپنے بیان میں کہا ہے کہ سیلاب سے50 ہزار مکانات تباہ ہوگئے ہیں، 100 سے زائد افراد سیلاب کی نذر ہوگئے۔

انہوں نے کہا کہ لانگ ٹرم پلاننگ بنائیں گے کیونکہ اگلے سال پھربارشیں ہونی ہیں، یہ پلان 2 ماہ میں ترتیب دے دیا جائیگا، بلوچستان میں نقصان کا اندازہ ہم ابھی نہیں لگا سکتے، ابھی ہم ریسکیو اور ریلیف کے مرحلے سے گزر رہے ہیں۔

     فرح عظیم شاہ نے کہا ہے کہ مون سون کا اسپیل جون سے شروع ہوا جو اب تک جاری ہے، بلوچستان کو اب بھی شدید بارشوں کا سامنا ہے جو سوچا بھی نہیں تھا، ہم ہرسال بارشوں کا رونا روتے ہیں، پتا نہیں گزشتہ حکومتیں کہاں سو رہی تھیں۔

  ترجمان حکومت بلوچستان نے کہا کہ ہمارے وزیر اعلیٰ نے تباہ کن صورتحال پر باہر سے ماہرین کو بلایا ہے، سیلاب سے متاثرہ بلوچستان کیلئے پوری قوم کو ایک ہو جانا چاہیے۔

انہوں نے کہا کہ دو دن پہلے وزیراعظم سے وزیراعلیٰ بلوچستان کی میٹنگ ہوئی ہے، وزیراعظم شہبازشریف کا دورہ کرنے کا پلان بھی ہے، وزیراعظم نے بلوچستان سے تعاون کی یقین دہانی کرائی ہے۔

     فرح عظیم شاہ نے کہا ہے کہ این ڈی ایم اے، پی ڈی ایم اے کے ساتھ مکمل رابطے میں ہے۔