وفاقی وزیر تعلیم و پیشہ وارانہ تربیت رانا تنویر حسین نے کہا ہے کہ حکومت پیشہ وارانہ تعلیم پر خصوصی توجہ دے رہی ہے۔

رانا تنویر نے بین الاقوامی اسلامی یونیورسٹی کے داخلہ ایکسپو سے خطاب کرتے ہوئے کہا کہ انڈسٹری اور جامعات مل کر تحقیق و تعاون کے ذریعے ملکی مسائل کا حل نکالیں۔

انہوں نے کہا کہ فنی تعلیم اور تکنیکی تجرںہ رکھنے والے افراد کی پوری دنیامیں مانگ ہے، حکومت پیشہ وارانہ تعلیم پر خصوصی توجہ دے رہی ہے۔

وفاقی وزیر کا کہنا ہے کہ یونیورسٹیاں پیشہ وارانہ تعلیم کے پروگرام شروع کریں، سعودی عرب کے حکام نے پاکستانی طلباء کے لیے اسکالرشپس فراہم کرنے کے سلسلے میں تعاون کی یقین دہانی کرائی۔

رانا تنویر نے مزید کہا کہ امن و برداشت اور اعلی تعلیم کے فروغ میں اسلامی یونیورسٹی کا کردار قابل ستائش ہے، اسلامی یونیورسٹی کی ترقی دیکھ کر خوشی ہوئی۔

دوسری جانب مولانا عبد الغفور حیدری نے کہا کہ اساتذہ کے ادب میں ہی کامیابی ہے، طلباء و طالبات مسقبل کے معمار ہیں، انتظامیہ کو مبارکباد دیتا ہوں۔

انہوں نے مزید کہا کہ اسلام کی ترویج میں بین الاقوامی اسلامی یونیورسٹی کا کردار مثالی ہے، اسلام کے پیغام امن کو عام کرنے  میں جامعات کا کردار کلیدی ہے۔

واضح رہے کہ تقریب میں مولانا عبدالغفور حیدری، ریکٹر و صدر اسلامی یونیورسٹی سمیت نائب صدور فکیلٹی ممبران اور طلباء و طالبات کی کثیر تعداد نے شرکت کی۔