سعودی حکومت نے بین الاقوامی مسافروں کے لیے مملکت اور اس کے ہوائی اڈوں کو پرکشش بنانے کے لیے ایئرپورٹ فیس میں 35 فیصد کمی کا عزم ظاہر کیا ہے۔ 

غیر ملکی خبررساں ادارے کی رپورٹ کے مطابق تخفیف کا فیصلہ اسی سال  نافذ ہوگا۔ سعودی محکمہ شہری ہوابازی ہوائی اڈوں کو معقول حد تک فیس میں کمی کا اختیار دے گا۔

محکمہ شہری ہوابازی نے  15 جولائی 2022 سے  سعودی عرب کی فضائی حدود دنیا بھر کی ایئرلائنز کے لیے کھولنے کا اعلان کیا تھا۔ ہر وہ ایئرلائن جو سعودی محکمہ شہری ہوابازی کے  مقررہ قواعد و ضوابط پورے کرے گی اسے سعودی عرب کی فضائی سرحدیں استعمال کرنے کی اجازت ہوگی۔

سعودی محکمہ شہری ہوابازی نے ٹوئٹر کے اپنے اکاؤنٹ پر دیے جانے والے بیان میں کہا ہے کہ سعودی عرب شکاگو معاہدہ 1944 کے تحت عائد ہونے والی پابندیاں پوری کرنا چاہتا ہے۔ اسی جذبے کے  تحت طے کیا گیا ہے کہ بین الاقوامی شہری ہوابازی  میں استعمال ہونے والے مسافر ہوائی جہازوں کے ساتھ کسی قسم کا کوئی امتیاز نہیں برتا جائے گا سب کے ساتھ یکساں معاملہ ہوگا۔

بیان میں مزید کہا گیا کہ سعودی عرب چاہتا ہے کہ وہ تین براعظموں کو جوڑنے والے خصوصی محل وقوع کی اپنی پوزیشن دنیا بھر میں مضبوط بنائے۔ اسی تناظر میں مملکت کی فضائی حدود تمام ایئرلائنز کے لیے کھولنے کا فیصلہ کیا گیا ہے۔