عدالت نے معروف اینکر پرسن ڈاکٹرعامر لیاقت کا پوسٹ مارٹم کرانے کا فیصلہ کالعدم قرار دے دیا۔

تفصیلات کے مطابق معروف اینکر پرسن ڈاکٹرعامرلیاقت کے پوسٹ مارٹم کرانے کے فیصلے کے خلاف عامر لیاقت کی صاحبزادی دعا عامر کی اپیل پرعدالت نے پوسٹ مارٹم کرانے کا فیصلہ کالعدم قراردیا۔

ڈاکٹرعامر لیاقت کی صاحبزادی کی جانب سے اپیل دائر کی گئی تھی جس پرعدالت نے جوڈیشل مجسٹریٹ شرقی کا فیصلہ کالعدم قراردیا۔

واضح رہے کہ جوڈیشل مجسٹریٹ شرقی نے 18 جون کو عامرلیاقت کا پوسٹ مارٹم کرانے کا حکم دیا تھا۔

شہری عبد الاحد کی جانب سے عامر لیاقت کے پوسٹ مارٹم کرانے کی درخواست دائر کی گئی تھی جبکہ عامرلیاقت کے ورثا نے پوسٹ مارٹم کرانے کی مخالفت کی تھی۔

جوڈیشل مجسٹریٹ کے فیصلے کے خلاف عامر لیاقت کی بیٹی دعا عامر نے سیشن عدالت میں اپیل دائر کی تھی۔

ایڈووکیٹ ضیا اعوان نے میڈیا سے گفتگو کرتے ہوئے کہا کہ عامر لیاقت کا پوسٹ مارٹم کرانے سے متعلق آرڈر ختم کردیا گیا۔ بچوں کو تکلیف دی گئی۔

وکیل ورثا کا کہنا تھا کہ پوسٹ مارٹم کی درخواست دینے والے ان کے خیرخواہ نہیں دشمن ہیں۔ درخواست گذار نے سوشل میڈیا پرعامر لیاقت کے لیے تضحیک آمیز پوسٹ لگائی۔

ڈاکٹرعامرلیاقت کی سابقہ اہلیہ بشری بی بی نے بات چیت کرتے ہوئے کہا کہ کسی نے ہم پر جائداد کا الزام لگایا کسی نے کچھ کہا۔ ہم یہ چاہتے تھے کہ ان کی لاش کی تضحیک نہ ہو۔

انھوں نے کہا کہ دانیہ نے جو حرکت کی وہ سب کے سامنے ہے۔ دانیہ شاہ کے خلاف کارروائی ہو رہی ہے، سزا دلوا کر رہیں گے۔ ایف آئی اے میں معاملہ انکوائری کی اسٹیج پر ہے۔