سابق چئیرمین نیب کی درخواست پرپی اے سی اورسیکریٹری قومی اسمبلی کو نوٹس جاری کر دیے گئے۔ 

تفصیلات کے مطابق اسلام آباد ہائی کورٹ میں سابق چیئرمین نیب جسٹس ریاٹائرڈ جاوید اقبال کی پبلک اکاؤنٹس کمیٹی طلبی اور عہدے سے ہٹانے کی سفارش کے خلاف کیس کی سماعت ہوئی۔

اسلام آباد ہائی کورٹ کے قائم مقام چیف جسٹس عامر فاروق  نے وقفے کے بعد کیس کی سماعت دوبارہ شروع کی جبکہ درخواست گزارکے وکیل شعیب شاہین روسٹرم پرآگئے۔

عدالت نے درخواست گزار کے وکیل سے استفسار کیا کہ یہ کون سا کیس ہے پہلے بھی اس طرح کے دو کیسز ہیں؟

اسلام آباد ہائی کورٹ نے پبلک اکاؤنٹس کمیٹی کی جسٹس ر جاوید اقبال کو لاپتہ افراد کی بازیابی کے لیے قائم کمیشن کی سربراہی سے ہٹانے کی سفارش معطل کرتے ہوئے پبلک اکاؤنٹس کمیٹی اورسیکریٹری قومی اسمبلی کو نوٹس جاری کر دیے۔

اسلام آباد ہائیکورٹ کے قائم مقام چیف جسٹس عامر فاروق نے 11 اگست تک جواب طلب کرتے ہوئے کیس کی سماعت ملتوی کر دی۔

واضح رہے کہ گذشتہ روز سابق چیئرمین نیب جسٹس( ر) جاوید اقبال نے پبلک اکاؤنٹس کمیٹی کے خلاف اسلام آباد ہائی کورٹ سے رجوع کیا تھا۔

اسلام آباد ہائی کورٹ میں درخواست دائرکرتے ہوئے مؤقف اپنایا گیا کہ پبلک اکاؤنٹس کمیٹی کے 7 جولائی کے اجلاس میں سابق چیئرمین نیب پرسنگین الزامات لگائے گئے۔

سابق چئیرمین نیب نے درخواست میں مؤقف اختیار کیا کہ پی اے سی نے جاوید اقبال کو بطورچیئرمین انکوائری کمیشن جبری گمشدگی کے عہدے سے ہٹانے کی سفارش کی۔ پبلک اکاؤنٹس کمیٹی نے اپنے دائرہ اختیار سے تجاوز کر کے ہدایات جاری کیں۔

جسٹس ریٹائرڈ جاوید اقبال کی درخواست میں یہ بھی مؤقف پیش کیا گیا کہ چیئرمین پی اے سی اپنے اختیارات کا غلط استعمال کر رہے ہیں۔ عدالت پی اے سی کے 7 جولائی کے کمیٹی منٹس کو کلعدم قرار دے۔