وزیراطلاعات سندھ شرجیل میمن نے کہا ہے کہ الیکشن کمیشن کے فیصلے کے بعد پی ٹی آئی کالعدم تصور ہوتی ہے۔

تفصیلات کے مطابق وزیراطلاعات سندھ شرجیل میمن نے اپنے بیان میں کہا ہے کہ عمران خان نے جھوٹا بیان حلفی دیا، سیاسی جماعت کا غیرملکی فنڈز لینا غیر قانونی ہے، عمران خان نوجوان نسل کو سڑکوں پرلاتے ہیں۔

انہوں نے کہا کہ عمران خان اداروں کی توہین کرتے ہیں، انکے خلاف بیانات دیتے ہیں، پی ٹی آئی کے13 اکاؤنٹس کی تفصیلات ظاہر نہیں کی گئیں، وفاق الیکشن کمیشن کے فیصلے کے بعد بھی نرمی سے کام لے رہا ہے۔

شرجیل میمن نے کہا کہ عمران خان کا کیس اوپن اینڈ شٹ ہے، الیکشن کمیشن کے فیصلے کے بعد پی ٹی آئی کالعدم تصور ہوتی ہے۔

بعدازاں وزیر اطلاعات سندھ شرجیل انعام میمن کی پریس کانفرنس پر حلیم عادل شیخ نے ردِ عمل دیتے ہوئے کہا کہ شہید محترمہ کے ساتھیوں اور بلاول بھٹو زرداری کے ساتھیوں کی تربیت شرجیل میمن سے دیکھی جاسکتی ہے۔

انہوں نے کہا کہ آصف علی زرداری جب بلیک پر سنیما کے ٹکٹ بیچتے تھے اس وقت عمران خان اسٹار تھے، صوبائی وزیر جب بس پر کنڈیکٹری کے دوران چرس سپلائی کرتے تھے اس وقت عمران خان جائیداد اور گاڑیوں کے مالک تھے۔

ان کا کہنا تھا کہ عمران خان بلاول زرداری کی طرح سونے کا چمچ لیکر پیدا نہیں ہوئے اپنی محنت سے نام بنایا ہے، شرجیل میمن جیسا کرپٹ وزیر عمران خان کے خلاف بات کر رہا ہے، شرجیل میمن وہی ہیں جو گرفتاری کے ڈر سے عدالت کے واش روم میں چھپے رہے تھے۔

حلیم عادل شیخ نے کہا کہ بے نامی اکاؤنٹس، جعلی اکاؤنٹس ایان علی کے لاج دلارے کرپشن پر لیکچر دے رہے ہیں؟ شرجیل میمن ملکی اداروں کو ایان علی نہ سمجھیں، ادارے آئین کے تابع ہیں۔

انہوں نے کہا کہ جتنی رقم عمران خان پر ثابت کر رہی ہیں اتنی تو زرداری صاحب روزانہ ایان علی اور بلاول کو شاپنگ کے لیے دیتے ہیں، شرجیل میمن اپنے زبان چلانے کے بجائے دماغ کا استعمال کریں، عمران خان کے خلاف روز 15 وزیر آکر پریس کانفرنسز کر رہے ہیں۔

اپوزیشن لیڈر سندھ اسمبلی حلیم عادل شیخ کا مزید کہنا تھا کہ شرجیل میمن بھڑکیں مارتے ہیں جب گرفتار ہوتے ہیں تو چھڑی اور ویل چیئر پر آجاتے ہیں، سندھ کی سب سے بڑی بیماری کے ہمنوا اپنے حدود میں رہیں۔