پسند کی شادی کرنے والی لڑکی کے مبینہ اغوا کے مقدمے میں پولیس نے عدالت میں رپورٹ پیش کردی۔ 

تفصیلات کے مطابق جوڈیشل مجسٹریٹ شرقی کراچی کی عدالت میں پسند کی شادی کرنے والی لڑکی کے مبینہ اغوا کے مقدمے میں پولیس کی جانب سے پیش رفت رپورٹ جمع کروا دی گئی۔

رپورٹ میں عدالت کو بتایا گیا کہ ملزم شبیراور ظہیر کے فون کا سی ڈی آر ڈیٹا حاصل کیا گیا ہے۔ جائے وقوعہ والے روز ملزمان کی کراچی میں موجودگی پائی گئی ہے۔ جس کا اعتراف ملزم شبیر نے دوران انٹروگیشن کیا ہے۔

پولیس کی رپورٹ کے مطابق مغویہ کا ظہیر احمد سے نکاح ہوا ہے کسی عدالت نے ابھی نکاح کوغیرقانونی قرارنہیں دیا۔ مغویہ کے میڈیکل کے لیے عدالت نے کوئی حکم نہیں دیا لہاذا زیادتی کی دفعہ 375 حذف کی جاتی ہے۔ مغویہ نے سندھ ہائی کورٹ، لاہورہائی کورٹ میں پیش ہو کراپنا 164 کا بیان ریکارڈ کرایا ہے۔

رپورٹ میں بتایا گیا کہ مغویہ نے اپنے بیان میں کہا ہے کہ کسی نے اغوا نہیں کیا اپنی مرضی سے ظہیر کے ساتھ شادی کی ہے۔ مقدمے سے کم عمر بچی کے اغوا کی دفعہ 364 اے بھی حذف کی جاتی ہے۔ گرفتارشدہ ملزمان غلام اصغر، غلام مصطفیٰ ضمانت پر رہا ظہیر اور شبیر کے ساتھ مل کر مغویہ کو اغوا کیا۔

عدالت میں پیش رپورٹ کے مطابق مذکورہ ملزمان نے مغویہ کو بہلا پھسلا کر کراچی سے اغوا کرکے لے گئے۔ مغویہ کو لاہور لے جا کرعمر18 سال بتا کروالدین کو بغیر بتائے بغیر مرضی اپنے وکیل کے ذریعے نکاح کیا۔ عدم گرفتارملزمان نور بی بی، منیرحسین، محمد وسیم اور رائے خرم نے کیس میں سہولت کاری کی ہے۔

پولیس رپورٹ کے مطابق عدم گرفتارملزمان آصف، مقبول نذیر، انیس سمیت 27 ملزمان کے خلاف شواہد نہیں ملے۔ ملزمان غلام اصغر، غلام مصطفی، ظہیراورشبیر کے خلاف کم عمر کے اغوا، انسداد انسانی اسمگلنگ ایکٹ اور سندھ چائلڈ ریسٹرین میرج ایکٹ کے تحت مقدمہ چلایا جائے۔

رپورٹ میں مذید کہا گیا کہ کیس میں تین ملزمان مسمات نور منیر، منیرحسین اور محمد وسیم مفرورہیں۔ کیس میں 27 ملزمان کے خلاف شواہد نہیں ملے ان کے نام کالم 2 میں رکھے گئے ہیں۔