عدالت نے نیب آفس حملہ کیس میں لیگی رہنماؤں کی قبل از گرفتاری  ضمانت منظورکر لی۔

انسداد دہشت گردی عدالت لاہورنے نیب آفس حملہ کیس میں  لیگی رہنماؤں کی قبل از گرفتاری  ضمانت منظورکرتے ہوئے پولیس کو دونوں رہنماؤں کو 5 ستمبر تک گرفتار کرنے سے روک دیا۔

لیگی رہنماؤں یاسین سوہل اور احسن رضا خان نے عبوری ضمانت لی۔

انسدادِ دہشت گردی کی عدالت نے ایک ایک لاکھ  کے ضمانتی مچلکے جمع کرانے کا حکم دیا۔

عدالت نے  آئندہ سماعت پر پولیس سے رپورٹ طلب کر لی۔

نذیرچوہان کو نوٹس بھجوانے کا معاملہ

دوسری جانب لاہورہائی کورٹ میں ن لیگی رہنما نذیرچوہان کو پولیس کی جانب سے نوٹس بھجوانے کے معاملے پرعدالت نے ایس پی آپریشنز کو معاملے کی خود انکوائری کی ہدایت کردی۔

جسٹس محمد شان گل نے لیگی رہنما نذیرچوہان کی درخواست پر سماعت کی۔

درخواست میں مؤقف اپنایا گیا کہ نذیرچوہان نجی ہاؤسنگ اسکیم کے مالک ہیں۔ انتخابات میں حصہ لینے سے پہلے ان کےخلاف کسی درخواست کا کوئی وجود نہیں تھا۔

درخواست میں یہ بھی کہا گیا کہ انتخابی امیدوار کےطور پر سامنے آتے ہی سیاسی انتقام کا نشانہ بنایا جارہا ہے۔ ہاؤسنگ اسکیم میں شہریوں کے نام سے فراڈ کی جھوٹی درخواستیں جمع کرائی گئیں۔ اے ایس پی کی جانب سے نوٹس بھجوا کر ہراساں کیا جا رہا ہے۔

درخواست میں عدالت سے استدعا کی گئی کہ عدالت پولیس کو ہراساں کرنے سے روکے۔