حالیہ بارشوں میں 13 ٹاورزگرنے سے کوئٹہ سمیت بلوچستان کا بڑا حصہ بجلی سے محروم ہو گیا۔

تفصیلات کے مطابق حالیہ بارشوں کے بعد صوبے کے بیشترعلاقے بجلی سے محروم ہیں۔ کیسکو کی نااہلی کے باعث کوئٹہ کو صرف وقفے وقفے سے چھ سے آٹھ گھنٹے بجلی فراہم ہوتی ہے۔ صوبے کے 32 اضلاع گزشتہ ایک ہفتے سے بجلی سے محروم ہیں۔

اس سلسلے میں کیسکو حکام کا کہنا ہے کہ بی بی نانی پل کے قریب این ٹی ڈی سی کے 220kvکے 10ٹاورگرگئے۔   132kv سبی، کوئٹہ ڈبل سرکٹ ٹرانسمیشن لائن کی مرمت وبحالی کا کام جاری ہے۔

کیسکو حکام کے مطابق اس وقت صوبائی دارالحکومت کوئٹہ کو متبادل ذرائع سے بجلی فراہم کی جارہی ہے۔ برقی قلت کو مدنظررکھتے ہوئے کوئٹہ شہر کے تمام فیڈروں کوضرورت کے مطابق باری باری بجلی فراہم کی جارہی ہے۔

کیسکیو حکام کا یہ بھی کہنا ہے کہ سبی ٹو کوئٹہ ٹرانسمیشن لائن سے بجلی کی بندش سے کیسکوسسٹم پر بوجھ زیادہ ہونے سے برقی قلت کا سامناہے۔ جمعہ تک 132kvسبّی ٹو کوئٹہ ڈبل سرکٹ کاکام مکمل ہوگا۔جس کے بعداس ٹرانسمیشن لائن سے بجلی بحال کردی جائے گی۔

کیسکو کے مطابق خضدار، وڈھ، باغبانہ، قلات، نال، زہری، بسیمہ، گدر، منگوچر، سوراب گرڈ اسٹیشنز سے منسلک علاقوں کوبجلی کی فراہمی تاحال معطل ہے۔ مستونگ، نوشکی، چاغی، خاران اوردالبندین کے علاقوں کوبھی بجلی کی فراہمی معطل ہے۔ لورلائی، ژوب، قلعہ سیف اللہ، پشین، چمن کو یومیہ 2 گھنٹے بجلی فراہم کی جا رہی ہے۔