ممنوعہ فنڈنگ کیس میں اکبرایس بابرنے پی ٹی آئی کی اپیل میں فریق بننے کے لیے عدالت میں درخواست دائر کردی۔ 

تفصیلات کے مطابق اسلام آباد ہائی کورٹ میں ممنوعہ فنڈنگ کیس میں اکبر ایس بابرنے تحریکِ انصاف کی اپیل میں فریق بننے کے لیے درخواست دائرکی۔

اسلام آباد ہائی کورٹ کا لارجر بنچ پی ٹی آئی کی اپیل پر کل سماعت کرے گا۔

اسلام آباد ہائی کورٹ کا لارجربنچ قائم مقام چیف جسٹس عامر فاروق کی سربراہی میں تین ججز پر مشتمل ہے جن میں  جسٹس میاں گل حسن اورنگزیب اور جسٹس بابرستارشامل ہیں۔

دوسری جانب ممنوعہ فنڈنگ کیس میں پی ٹی آئی کے لیے فنانشل ڈیپارٹمنٹ کے افسر نعمان کا ایف آئی اے نوٹس کے خلاف کیس پرسماعت ہوئی۔

اسلام آباد ہائی کورٹ کے قائم مقام چیف جسٹس عامر فاروق نے کیس کی سماعت کی جبکہ درخواست گزار کی جانب سے علی گوہر جبکہ وفاق سے ارشد کیانی عدالت میں پیش ہوئے۔

علی گوہر ایڈوکیٹ نے مؤقف اپنایا کہ الیکشن کمیشن نے وفاقی حکومت یا ایف آئی اے کو کسی کارروائی کا نہیں کہا۔

اسسٹنٹ ڈائریکٹرنے کہا کہ ہمیں وفاقی حکومت نے انکوائری شروع کرنے کا حکم دیا ہے۔

ایف آئی اے کی جانب سے عدالت سے جواب جمع کرانے کے لیے مزید وقت کی استدعا کی گئی۔

قائم مقام چیف جسٹس اسلام آباد ہائی کورٹ نے ایک ہفتے کا وقت دیتے ہوئے سماعت آئندہ ہفتے تک ملتوی کردی۔