پرویز اشرف نےکہا ہے کہ تباہ کن بارشوں نے بڑے پیمانے پر تبائی مچائی ہے۔

  تفصیلات کے مطابق ترکی کی گرینڈ نیشنل اسمبلی کے اسپیکر پروفیسر ڈاکٹر مصطفیٰ سینٹوپ کا اسپیکر قومی اسمبلی راجہ پرویز اشرف سے ٹیلیفونک رابطہ ہوا جس میں ترک اسپیکر نے تباہ کن سیلاب  کے نتیجے میں جانی و مالی نقصانات پر افسوس کا اظہار کیا۔

ٹیلیفونک رابطے کے دوران اسپیکر قومی اسمبلی نے سیلاب زدگان کی بروقت امداد پر اپنے ترک ہم منصب اور ترک حکومت کا شکریہ ادا کیا۔

اس موقع پر اسپیکر قومی اسمبلی راجہ پرویز اشرف نے کہا کہ جون 2022 کے بعد پاکستان میں ریکارڈ کی گئی سب سے زیادہ بارشیں ہوئیں ہیں۔

راجہ پرویز اشرف کا کہنا تھا کہ تباہ کن بارشوں نے بڑے پیمانے پر تبائی مچائی ہے، سیلاب اور لینڈ سلائیڈنگ کی وجہ سے انسانی جانوں، معیشت، مویشیوں، املاک اور بنیادی ڈھانچے کو شدید نقصان پہنچایا ہے۔

اسپیکر قومی اسمبلی کا یہ بھی کہنا تھا کہ ترکی مشکل کی اس گھڑی میں برادر ملک پاکستان کی ہر ممکن مدد کے لیے ہمہ وقت تیار ہے۔

پرویز اشرف نے کہا کہ انفراسٹرکچر کو پہنچنے والا نقصان لوگوں کی محفوظ مقامات پر منتقلی میں رکاوٹ کی وجہ بنی، ترکی کی پارلیمنٹ اور عوام نے ہر مشکل وقت میں پاکستان کا ساتھ دیا ہے۔

اسپیکر قومی اسمبلی راجہ پرویز اشرف نے اپنے ترک ہم منصب کا شکریہ ادا کیا اور کہا کہ پاکستان اور ترکی آزمائش کی گھڑی میں ایک دوسرے کے شانہ بشانہ کھڑے رہتے ہیں۔

  اس موقع پر ترک اسپیکر نے پاکستان کی حکومت، پارلیمنٹ اور عوام کے ساتھ اپنی دلی ہمدردی اور یکجہتی کا اظہار کرتے ہوئے کہا کہ پاکستان اور ترکی یک جان دو قالب کی مانند ہیں۔

ترکی کی گرینڈ نیشنل اسمبلی کے اسپیکر پروفیسر ڈاکٹر مصطفیٰ سینٹوپ نے مزید کہا کہ ترک عوام کے دل پاکستان میں اپنے بھائیوں اور بہنوں کے ساتھ دھڑکتے ہیں، ترک حکومت اور عوام قدرتی آفت کے دوران اپنے پیاروں کو کھونے والے خاندانوں سے اظہار تعزیت کرتے ہیں۔